 ജിയോയുടെ ലാഭക്കുതിപ്പ് 182%

മുംബയ്: ഇന്ത്യയിലെ ഏറ്റവും മൂല്യമേറിയ കമ്പനിയായ റിലയൻസ് ഇൻഡസ്‌ട്രീസ് നടപ്പുവർഷത്തെ ഏപ്രിൽ-ജൂൺപാദത്തിൽ 30.97 ശതമാനം കുതിപ്പോടെ 13,​233 കോടി രൂപയുടെ ലാഭം നേടി. പ്രവർത്തനേതര വരുമാനം 54 ശതമാനം വർദ്ധിച്ച് 4,​388 കോടി രൂപയിൽ എത്തിയത് കമ്പനിക്ക് നേട്ടമായി. ബ്രിട്ടീഷ് കമ്പനിയായ ബി.പിയുമായി ചേർന്നുള്ള സംയുക്ത സംരംഭമായ റിലയൻസ് ബി.പി. മൊബിലിറ്റി സർവീസസിൽ 4,​966 കോടി രൂപയുടെ നിക്ഷേപം ലഭിച്ചതും കരുത്തായി.

റിലയൻസിന്റെ ടെലികോം/ഡിജിറ്റൽ വിഭാഗമായ ജിയോയുടെ ലാഭം 182.82 ശതമാനം മുന്നേറി 2,​520 കോടി രൂപയിലെത്തി. മുൻവർഷത്തെ സമാനപാദത്തിൽ ലാഭം 891 കോടി രൂപയായിരുന്നു. പ്രവർത്തന വരുമാനം 33.70 ശതമാനം വർദ്ധിച്ച് 16,​557 കോടി രൂപയായി. ശരാശരി ഉപഭോക്തൃ വരുമാനം (എ.ആർ.പി.യു)​ 129 രൂപയിൽ നിന്ന് 157 രൂപയിലെത്തിയത് ജിയോയ്ക്ക് നേട്ടമായി.

അതേസമയം,​ റിലയൻസ് റീട്ടെയിൽ 17 ശതമാനവും പെട്രോകെമിക്കൽസ് 33 ശതമാനവും റിഫൈനിംഗ് ബിസിനസ് 54 ശതമാനവും ഓയിൽ ആൻഡ് ഗ്യാസ് 45 ശതമാനവും മീഡിയ 35.20 ശതമാനവും വരുമാന നഷ്‌ടം കുറിച്ചു. റിലയൻസിന്റെ സഞ്ചിതവരുമാനം 42 ശതമാനം താഴ്‌ന്ന് 95,​626 കോടി രൂപയിലുമെത്തി.