ചിക്കാഗോ: മുതിർന്നവരെ അപേക്ഷിച്ച് ചെറിയ കുട്ടികളുടെ ശരീരത്തിൽ കൊറോണ വൈറസിന്റെ തോത് കൂടുതലെന്ന് പഠനം. മുതിർന്ന കുട്ടികളുമായും മുതിർന്നവരുമായും താരതമ്യം ചെയ്യുമ്പോൾ അഞ്ച് വയസിൽ താഴെയുള്ള കുട്ടികളുടെ ശരീരത്തിൽ കൊറോണ വൈറസിന്റെ സാന്നിധ്യം 10 മുതൽ 100 മടങ്ങ് വരെ അധികമാണെന്ന് പഠനത്തിൽ കണ്ടെത്തി.

ജാമ പീഡിയാട്രിക് എന്ന ജേണലിൽ ആണ് പഠനം പ്രസിദ്ധീകരിച്ചിരിക്കുന്നത്. വൈറസ് സാന്നിധ്യം കൂടുതലുള്ളതുകൊണ്ടുതന്നെ കൊവിഡ് വ്യാപനത്തിന് ചെറിയ കുട്ടികൾ കാരണമാകാമെന്ന് പഠനം ചൂണ്ടിക്കാട്ടുന്നു.

പഠനത്തിന്റെ ഭാഗമായി മാർച്ച് 23 നും ഏപ്രിൽ 27 നും ഇടയിൽ രോഗലക്ഷണങ്ങൾ പ്രകടിപ്പിച്ച ചിക്കാഗോയിലെ 145 രോഗികളിൽ സ്രവ പരിശോധന നടത്തിയിരുന്നു. അഞ്ച് വയസിന് താഴെയുള്ള 46 കുട്ടികൾ, അഞ്ച് മുതൽ 17 വരെ പ്രായമുള്ള 51 പേർ, 18 മുതൽ 65വരെ പ്രായമുള്ള 48 പേർ എന്നിങ്ങനെ രോഗികളെ തരംതിരിച്ചാണ് പഠനം നടത്തിയത്.