കൊച്ചി: ആഭരണ പ്രിയരെ ആശങ്കയിലാഴ്‌ത്തി സ്വർണവില പവന് ചരിത്രത്തിൽ ആദ്യമായി 40,​000 രൂപയിലെത്തി. ഗ്രാം വില 5,000 രൂപയും പിന്നിട്ടു. പവന് 280 രൂപയും ഗ്രാമിന് 35 രൂപയുമാണ് ഇന്നലെ ഉയർന്നത്. 2020ൽ ഇതുവരെ പവന് 11,​000 രൂപയും ഗ്രാമിന് 1,​325 രൂപയും കൂടി. ജൂലായിൽ മാത്രം പവന് 4,​200 രൂപയും ഗ്രാമിന് 525 രൂപയും ഉയർന്നു.

കൊവിഡ് സൃഷ്‌ടിച്ച ആഗോള സാമ്പത്തിക പ്രതിസന്ധി കൂടുതൽ രൂക്ഷമാകുന്നുവെന്ന വിലയിരുത്തലാണ് സ്വർണത്തിന് നേട്ടമാകുന്നത്. ഓഹരി,​ കടപ്പത്ര വിപണികളിൽ നിന്ന് വൻതോതിൽ പണം പിൻവലിച്ച്,​ സ്വർണത്തിലേക്ക് ഒഴുക്കുകയാണ് നിക്ഷേപകർ.

നിക്ഷേപത്തിലെ മികച്ച ഉണർവിന്റെ കരുത്തിൽ രാജ്യാന്തര വില ഔൺസിന് 16.69 ഡോളർ ഉയർന്ന് 1,​973.69 ഡോളറിലെത്തി. 2011 ആഗസ്‌റ്റിൽ കുറിച്ച 1,​917 ഡോളറെന്ന റെക്കാഡ് കഴിഞ്ഞവാരം തന്നെ മറികടന്നിരുന്നു. കൊവിഡ് വാക്‌സിൻ വൈകിയാൽ,​ രാജ്യാന്തര വില വൈകാതെ 2,​000 ഡോളർ ഭേദിച്ചേക്കും. ഇന്ത്യയിലെ വിലയെ ഇതു പുതിയ ഉയത്തിലേക്കും നയിക്കും. 

പൊന്നിൻ കുതിപ്പ്

(പവൻ വില ഈ വർഷം)​

ജനുവരി 1 : ₹29,​000

മാർച്ച് 1 : ₹31,​040

മേയ് 1 : ₹33,​400

ജൂൺ 1 : ₹34,​480

ജൂലായ് 31 : ₹40,​000

₹44,​600

നിലവിൽ ഒരു പവൻ ആഭരണം വാങ്ങാൻ കേരളത്തിൽ നൽകേണ്ട കുറഞ്ഞ വില 44,​600 രൂപയാണ്. എട്ട് ശതമാനം പണിക്കൂലി,​ മൂന്നു ശതമാനം ജി.എസ്.ടി.,​ 0.25 ശതമാനം സെസ് എന്നിവ കൂട്ടിച്ചേർത്താണിത്.