ചെന്നൈ: ഇന്ത്യയിലെ ഏറ്റവും വലിയ ഇൻഷ്വറൻസ് കമ്പനിയായ ലൈഫ് ഇൻഷ്വറൻസ് കോർപ്പറേഷൻ ഒഫ് ഇന്ത്യ (എൽ.ഐ.സി)​ 2019-20ൽ 25.17 ശതമാനം വളർച്ചയുമായി 1.78 ലക്ഷം കോടി രൂപയുടെ പുതു പ്രീമിയം ബിസിനസ് സ്വന്തമാക്കി. പെൻഷൻ,​ ഗ്രൂപ്പ് സൂപ്പർ ആന്വേഷൻ ബിസിനസ് ചരിത്രത്തിൽ ആദ്യമായി ഒരുലക്ഷം കോടി രൂപ കടന്ന്,​ 1.26 ലക്ഷം കോടി രൂപയിലെത്തി. 39.46 ശതമാനമാണ് വർദ്ധന.

മൊത്തം പ്രീമീയം വരുമാനം 3.37 ലക്ഷം കോടി രൂപയിൽ നിന്ന് 12.42 ശതമാനം വർദ്ധിച്ച് 3.79 ലക്ഷം കോടി രൂപയായി. മൊത്തം പോളിസി വിതരണം 2.54 ലക്ഷം കോടി രൂപയാണ്; വർദ്ധന 1.31 ശതമാനം. 9.83 ശതമാനം വളർച്ചയുമായി 6.15 ലക്ഷം കോടി രൂപയുടെ മൊത്തം വരുമാനവും എൽ.ഐ.സി നേടി. കമ്പനിയുടെ മൊത്തം ആസ്‌തി 2.71 ശതമാനം ഉയർന്ന് 31.96 ലക്ഷം കോടി രൂപയിലുമെത്തി.