കൊ​ണ്ടോ​ട്ടി: ക​രി​പ്പൂർ വി​മാ​ന​ത്താ​വ​ള​ത്തിൽ മൂ​ന്നു യാ​ത്ര​ക്കാ​രിൽ നി​ന്നായി എ​യർ ക​സ്​റ്റം​സ് ഇന്റ​ലി​ജൻ​സ് ഒന്നരക്കോടി​യു​ടെ സ്വർ​ണം പി​ടി​കൂ​ടി. റാ​സൽഖൈ​മ​യിൽ നി​ന്ന് സ്‌പൈസ് ജെ​റ്റ് വി​മാ​ന​ത്തി​ലെത്തിയ മ​ല​പ്പു​റം തേ​ഞ്ഞിപ്പ​ലം ടി.പി. ജി​ഷാർ, കോ​ഴി​ക്കോ​ട് കോ​ട​ഞ്ചേ​രി പി.എം. അ​ബ്ദുൾ ജ​ലീൽ, ദോ​ഹ​യിൽ നിന്നു ഖ​ത്ത​ർ വ​ഴി ഇൻഡിഗോ വി​മാ​ന​ത്തി​ലെത്തിയ കോ​ഴി​ക്കോ​ട് കൊ​ടു​വ​ള്ളി മു​ഹമ്മ​ദ് റി​യാ​സ് എ​ന്നി​വ​രിൽ നി​ന്നാണ് 3.3 കി​ലോ​ഗ്രാം സ്വർ​ണമി​ശ്രി​തം പി​ടി​കൂ​ടി​യ​ത്.സ്വർ​ണം പൊ​ടി​ച്ചു ചെറി​യ പാ​ക്ക​റ്റു​ക​ളി​ലാ​ക്കി ഒളിപ്പിച്ചായിരുന്നു കടത്ത്. ചാർ​ട്ടേഡ് വി​മാ​ന​ങ്ങ​ളി​ലെത്തിയവരാണ് മൂവരും.
അ​ടി​വ​സ്​ത്ര​ത്തിൽ ഒ​ളി​പ്പി​ച്ച 2.045 കിലോ സ്വർ​ണ​മി​ശ്രി​ത​മാ​ണ് അ​ബ്ദുൾ ജ​ലീലിൽ നി​ന്നു ക​ണ്ടെ​ടു​ത്ത​ത്. മുഹമ്മദ് റിയാസിന്റെ അ​ടി​വ​സ്​ത്ര​ത്തിൽ നി​ന്നു 800 ഗ്രാം സ്വർ​ണം ക​ണ്ടെ​ടു​ത്തു. ധ​രി​ച്ചി​രുന്ന ജീൻ​സി​ന്റെ പ്ര​ത്യേക പോ​ക്ക​റ്റി​ലാ​ണ് 500 ഗ്രാം സ്വർ​ണ​മി​ശ്രി​തം ജി​ഷാർ ഒ​ളി​പ്പി​ച്ചി​രു​ന്ന​ത്. നേരത്തേ സൂചന ലഭിച്ചിരുന്നു.