കൊല്ലങ്കോട്: വന്യജീവികളോടും കാലാവസ്ഥാ വ്യതിയാനത്തോടും കൊവിഡ് പ്രതിസന്ധിയോടുമെല്ലാം പടപൊരുതി കൃഷിയിറക്കിയ പനങ്ങാട്ടിരിയെന്ന പച്ചക്കറി ഗ്രാമത്തിലെ കർഷകർക്ക് ഇപാവശ്യവും ബാക്കിയായത് നഷ്ടക്കണക്ക് മാത്രം.

പാവൽ,​ പടവലം,​ വെണ്ട,​ പയർ തുടങ്ങിയവയാണ് പ്രധാന കൃഷി. മലയോര മേഖലയോട് ചേർന്ന് സ്വന്തമായും പാട്ടത്തിനെടുത്തുമുള്ള മണ്ണിൽ കഠിനദ്ധ്വാനത്തിൽ വിളയിച്ചെടുത്ത പച്ചക്കറി,​ മാർക്കറ്റുകളിലെത്തുമ്പോൾ തുച്ഛമായ വില മാത്രമാണ് ലഭിക്കുന്നത്. ഇത് കൂലി പോയിട്ട് വണ്ടിക്കൂലിക്ക് പോലും തികയില്ല.

കൊവിഡ് വ്യാപനം മൂലം പ്രധാന വിപണന കേന്ദ്രങ്ങളിൽ വില്പനയില്ലാത്തതും പ്രതിസന്ധി കൂട്ടുന്നു. അത്യുല്പാദന ശേഷിയുള്ള മായ എന്നയിനം പാവൽ മികച്ച വിളവ് ലഭിച്ചെങ്കിലും 15-20 രൂപയാണ് കിലോയ്ക്ക് ലഭിക്കുന്നത്. നേരത്തെ 30-40 രൂപ ലഭിച്ച സ്ഥാനത്താണീ ദുരവസ്ഥ. മഴ കനത്തതോടെ ഇല ചീയൽ,​ പന്തൽ വീഴൽ തുടങ്ങിയ പ്രതിസന്ധിയും കർഷകർ നേരിടണം. ബാങ്ക് വായ്പയെടുത്തും സ്വർണ്ണാഭരണം പണയപ്പെടുത്തിയുമാണ് പലപ്പോഴും വിളവിറക്കുന്നത്.

പച്ചക്കറി കൃഷിയിൽ ഇത്തവണ മികച്ച വിളവ് ലഭിച്ചു. പാവലാണ് കൂടുതൽ ലഭിച്ചത്. കീടശല്യം തുടങ്ങിയവയൊന്നും അധികം ബാധിച്ചില്ല. പക്ഷേ,​ പൊതുവിപണിയിലെ വിലക്കുറവ് എല്ലാ പ്രതീക്ഷയും തെറ്റിച്ചു.

-ശിവകുമാർ,​ കർഷകൻ,​ നാരാങ്ങാകളം,​ പനങ്ങാട്ടിരി.