തിരുവല്ല: ജില്ലയിലെ നിരണം പഞ്ചായത്തിനെയും ആലപ്പുഴ ജില്ലയിലെ തലവടി പഞ്ചായത്തിനെയും ബന്ധിപ്പിക്കുന്ന തോട്ടടി കടവിൽ പുതിയ പാലം വേണമെന്ന ആവശ്യം ശക്തമാകുന്നു.തുടർ പ്രവർത്തനങ്ങൾക്കായി തോട്ടടി പാലം സമ്പാദക സമിതി രൂപികരിച്ചു.20 വർഷങ്ങൾക്ക് മുമ്പ് കെ.സി.ജോസഫ് എം.എൽ.എ ഫണ്ടിൽനിന്നും പണി കഴിപ്പിച്ചതാണ് നിലവിലുള്ള വീതികുറഞ്ഞ പാലം.മൂന്നുകരയെയും ബന്ധിപ്പിച്ച് കടത്തുവള്ളവും നടപ്പാതയും മാത്രം ഉണ്ടായിരുന്നപ്പോഴാണിത്. പ്രധാനമന്ത്രി സഡക്ക് യോജന ഗ്രാമീണ പദ്ധതി പ്രകാരം വീതിയുള്ള റോഡിന്റെ നിർമ്മാണം പൂർത്തിയായിട്ട് വർഷങ്ങൾ കഴിയുന്നു.പാലത്തിന്റെ കൈവരികൾ തകർന്നും തൂണുകൾ ദ്രവിച്ചും അപകടാവസ്ഥയിലാണ്.അപകടാവസ്ഥയിലുള്ളതും സുരക്ഷിതത്വവും ഇല്ലാത്ത തോട്ടടി പാലം പൊളിച്ച് കളഞ്ഞ് പുതിയ പാലം നിർമ്മിക്കണമെന്ന് ആവശ്യപെട്ട് വിവിധ രാഷ്ട്രീയപാർട്ടികളും സന്നദ്ധ സംഘടനകളും വ്യക്തികളും ഇതിനോടകം നിരവധി സമരപരിപാടികൾ നടത്തി.അധികൃതർക്ക് നല്കിയ നിവേദനത്തെതുടർന്ന് നിലവിലുള്ള പാലത്തിന്റെ റിപ്പോർട്ട് അടിയന്തരമായി സമർപ്പിക്കുന്നതിന് സംസ്ഥാന പൊതുമരാമത്ത് മന്ത്രി ജി.സുധാകരൻ ഉദ്യോഗസ്ഥർക്ക് നിർദ്ദേശം നല്കി.

പാലം സമ്പാദക സമിതി രൂപികരിച്ചു

കൂട്ടായ പ്രവർത്തനത്തിലൂടെ ആവശ്യം നേടിയെടുക്കുന്നത് ലക്ഷ്യമിട്ട് കൊവിഡ് പ്രോട്ടോക്കോൾ പൂർണമായും പാലിച്ച് നടന്ന യോഗത്തിൽ ഹ്യൂമൻ റൈറ്റ്സ് പ്രൊട്ടക്ഷൻ കൗൺസിൽ ഒഫ് ഇന്ത്യ സംസ്ഥാന ചെയർമാൻ ഡോ.ജോൺസൺ വി.ഇടിക്കുള അദ്ധ്യക്ഷത വഹിച്ചു.നിരണം പഞ്ചായത്ത് പ്രസിഡന്റ് ലതാ പ്രസാദ് ഉദ്ഘാടനം ചെയ്തു.റോബി തോമസ്, സുരേഷ് പി.ഡി,മത്തായി വർഗീസ്,വിൻസൻ പൊയ്യാലുമാലിൽ,പി.ഒ മാത്യു,പി.കെ ആനന്ദൻ എന്നിവർ സംസാരിച്ചു. നിരണം,തലവടി പഞ്ചായത്ത് പ്രസിഡന്റുമാർ രക്ഷാധികാരികളും ഡോ.ജോൺസൺ വി.ഇടിക്കുള(ചെയർമാൻ), റോബി തോമസ്(പ്രസിഡൻ്റ്),അഡ്വ.സി.പി.സൈജേഷ്,മത്തായി വർഗീസ്,എം.എ വാസുദേവൻ (വൈസ് പ്രസിഡന്റുമാർ) വിൻസൺ പൊയ്യാലുമാലിൽ (ജനറൽ കൺവീനർ) പി.ഡി.സുരേഷ്(കൺവീനർ) എന്നിവരടങ്ങിയ 17അംഗ സമിതി രൂപികരിച്ചു.