മല്ലപ്പള്ളി : മല്ലപ്പള്ളി-ആനിക്കാട് പഞ്ചായത്തുകളെ ബന്ധിപ്പിച്ച് മണിമലയാറിന് കുറുകെ നിർമ്മിച്ച കാവനാൽകടവ് പാലത്തിന്റെ ഉദ്ഘാടനം നാളെ മന്ത്രി ജി.സുധാകരൻ വീഡിയോ കോൺഫറൻസിലൂടെ നിർവഹിക്കും. മാത്യു.ടി തോമസ് എം.എൽ.എയുടെ അദ്ധ്യക്ഷതയിൽ മുരണി യു.പി സ്‌കൂൾ കെട്ടിടത്തിൽ നടക്കുന്ന ചടങ്ങിൽ ആന്റോ ആന്റണി എംപി മുഖ്യാതിഥിയാകും.
568.46 ലക്ഷം രൂപയാണ് പാലത്തിന്റെ നിർമ്മാണ ചെലവ്. 126.6 മീറ്റർ നീളവും 11.05 മീറ്റർ വീതിയുമുള്ള പാലത്തിൽ ഏഴര മീറ്റർ വീതിയിൽ വാഹന ഗതാഗത പാതയും ഒന്നര മീറ്റർ വീതിയിൽ ഇരുവശത്തും നടപ്പാതയും നിർമ്മിച്ചിട്ടുണ്ട്. ജില്ലാ പഞ്ചായത്ത് പ്രസിഡന്റ് അന്നപൂർണാ ദേവി, മല്ലപ്പള്ളി ബ്ലോക്ക് പഞ്ചായത്ത് പ്രസിഡന്റ് ശോശാമ്മ തോമസ്, മല്ലപ്പള്ളി പഞ്ചായത്ത് പ്രസിഡന്റ് റെജി ശാമുവേൽ, ആനിക്കാട് പഞ്ചായത്ത് പ്രസിഡന്റ് തോമസ് മാത്യു, ഡിവിഷൻ എക്‌സിക്യൂട്ടിവ് എൻജിനിയർ ഡോ.എ.സിനി തുടങ്ങിയവർ ചടങ്ങിൽ പങ്കെടുക്കും.