പത്തനംതിട്ട : 60ന് മുകളിലും 10ന് താഴെയും പ്രായമുള്ളവർ, ശ്വാസകോശ രോഗമുള്ളവർ, കിഡ്‌നി സംബന്ധമായ അസുഖമുള്ളവർ, ഡയബറ്റിക്‌സ്, ഹൃദ്രോഗമുള്ളവർ തുടങ്ങിയവർക്ക് രോഗം ബാധിച്ചാൽ ഗുരുതരാവസ്ഥയും മരണം വരെയും സംഭവിക്കാം. ഇത്തരത്തിലുള്ളവർ വീടുകളിൽ ക്വാറന്റൈനിൽ കഴിയുന്നതാണ് റിവേഴ്‌സ് ക്വാറന്റൈൻ. ഇവർക്ക് പ്രത്യേക കരുതൽ ആവശ്യമുണ്ട്.
ഇവർ എല്ലായ്‌പ്പോഴും വീട്ടിൽ തന്നെ കഴിയണം. സന്ദർശകരുമായി ഇടപഴകരുത്. ആളുകൾ ഒത്തുകൂടുന്ന സാഹചര്യം ഒഴിവാക്കണം. കൈകൾ ഇടയ്ക്കിടെ സോപ്പ് ഉപയോഗിച്ച് കഴുകണം.
ലഘുവ്യായാമങ്ങൾ പരിശീലിക്കുകയും, പോഷകഗുണങ്ങളുള്ള ഭക്ഷണം കഴിക്കുകയും ചെയ്യണം. കഴിച്ചുകൊണ്ടിരിക്കുന്ന മരുന്നുകൾ മുടങ്ങരുത്. എപ്പോഴും കൈകൊണ്ട് സ്പർശിക്കാൻ സാധ്യതയുള്ള കണ്ണട പോലുള്ള വസ്തുക്കൾ വൃത്തിയാക്കി വയ്ക്കണം.
എന്തെങ്കിലും ആരോഗ്യപ്രശ്‌നങ്ങൾ ഉണ്ടായാൽ ടെലികൺസൾട്ടേഷൻ സേവനം ഉപയോഗിക്കുകയോ ആരോഗ്യ പ്രവർത്തകരെ വിവരം അറിയിക്കുകയോ ചെയ്യണം.
സാധാരണ ചെറിയ ആരോഗ്യപ്രശ്‌നങ്ങൾക്ക് ആശുപത്രിയിൽ പോകണമെന്നില്ല. കുടുംബാംഗങ്ങളെയോ സുഹൃത്തുക്കളെയോ വീട്ടിലേക്ക് ക്ഷണിക്കരുത്.
മദ്യം, പുകയില തുടങ്ങിയവ ഉപയോഗിക്കരുത്. സന്തോഷത്തോടെയും മാനസികാരോഗ്യത്തോടെയും കഴിയണം.

വിളിക്കണം, അറിയിക്കണം

വിവരങ്ങൾ അറിയുന്നതിനും സംശയങ്ങൾ ദുരീകരിക്കുന്നതിനും 24 മണിക്കൂറും പ്രവർത്തിക്കുന്ന ജില്ലാ കൺട്രോൾ റൂമിലേക്ക് വിളിക്കാം. കണ്ടെയ്ൻമെന്റ് സോണിലുള്ളവർക്ക് പനി, ചുമ, തൊണ്ടവേദന തുടങ്ങിയ രോഗലക്ഷണങ്ങൾ ഉണ്ടെങ്കിലും ഈ നമ്പരുകളിൽ വിളിക്കാം.
കൺട്രോൾ റൂം നമ്പരുകൾ: ജില്ലാ മെഡിക്കൽ ഓഫീസ് : 0468 2228220, 9188294118, 8281413458, ദുരന്തനിവാരണ വിഭാഗം : 0468 2322515, മാനസികാരോഗ്യ പിന്തുണ : 8281113911.