പത്തനംതിട്ട: ജില്ലയില്‍ പ്ലസ് ടു ഫലം മെച്ചപ്പെടുത്താൻ കഴിഞ്ഞത് ജില്ലാ പഞ്ചായത്തിന്റെ നേതൃത്വത്തില്‍ നടപ്പാക്കിയ കൈത്താങ്ങ് വിദ്യാഭ്യാസ പരിപാടിയുടെ ഫലം കൂടിയാണെന്ന് ജില്ലാ പഞ്ചായത്ത് പ്രസിഡന്റ് അന്നപൂര്‍ണാദേവി, വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ കെ.ജി അനിത എന്നിവര്‍ അറിയിച്ചു. 15 വിഷയങ്ങള്‍ക്ക് പഠനസഹായികള്‍ തയാറാക്കിയ അദ്ധ്യാപകരെയും വിദ്യാലയ പ്രവര്‍ത്തനങ്ങള്‍ സംഘടിപ്പിക്കുവാന്‍ നേതൃത്വം നല്‍കിയ അദ്ധ്യാപകരെയും അഭിനന്ദിച്ചു.
വിജയശതമാനത്തില്‍ സംസ്ഥാന ശരാശരിയുമായി മൂന്ന് ശതമാനത്തിന്റെ മാത്രമേ വ്യത്യാസമുള്ളൂ എന്നതും പ്രത്യേകതയാണ്. .
അടുത്ത വര്‍ഷം പ്ലസ് വണ്‍ ക്ലാസുകളിലും കൈത്താങ്ങ് പഠനസഹായികള്‍ തയാറാക്കാന്‍ ജില്ലാ പഞ്ചായത്ത് എട്ട് ലക്ഷം രൂപയുടെ പദ്ധതി തയ്യാറാക്കിയിട്ടുണ്ടെന്ന് അവർ പറഞ്ഞു.
ജില്ലയുടെ സ്ഥാനം മെച്ചപ്പെട്ടതിന്റെ സന്തോഷമറിയിച്ച് വിദ്യാഭ്യാസ ഉപ ഡയറക്ടര്‍ പി.കെ ഹരിദാസ് പ്രസിഡന്റ് അന്നപൂര്‍ണാദേവിക്ക് മധുരം നല്‍കി. ജില്ലാ പഞ്ചായത്ത് പൊതുമരാമത്ത് സ്റ്റാന്‍ഡിംഗ് കമ്മിറ്റി ചെയര്‍മാന്‍ അഡ്വ.റജി തോമസ്, അംഗങ്ങളായ സാം ഈപ്പന്‍, എസ്.വി സുബിന്‍, പൊതുവിദ്യാഭ്യാസ സംരക്ഷണ യജ്ഞം ജില്ലാ കോ-ഓര്‍ഡിനേറ്റര്‍ രാജേഷ് എസ് വള്ളിക്കോട് എന്നിവര്‍ പങ്കെടുത്തു.