മല്ലപ്പള്ളി : ജില്ലാ കളക്ടറുടെ പരാതി പരിഹാര താലൂക്കുതല ഓൺലൈൻ അദാലത്ത് മല്ലപ്പള്ളി പഞ്ചായത്ത് അക്ഷയകേന്ദ്രത്തിൽ നടന്നു. ജില്ലാ കളക്ടർ പി.ബി.നൂഹ് കളക്ടറേറ്റിൽനിന്നു വീഡിയോ കോൺഫറൻസിലൂടെ നടത്തിയ ഉദ്ഘാടനത്തിന് ശേഷം 16 പരാതികളാണ് പരിഗണിച്ചത്. വീഡിയോ കോൺഫറൻസിൽ പങ്കെടുക്കുന്നതിന് അനുവദിച്ചിട്ടുള്ള സമയത്ത് കൊവിഡ്-19 മാനദണ്ഡങ്ങൾ പാലിച്ച് നടത്തിയ അപേക്ഷയിൽ 15 പരാതിക്കാർ ഓൺലൈനായി അധികാരികളുമായി സംസാരിച്ചു. ജില്ലാ കളക്ട്രേറ്റിൽ നിന്ന് നിയന്ത്രിച്ച അദാലത്തിൽ ജില്ലാ, താലൂക്കുതല ഉദ്യോഗസ്ഥരും പഞ്ചായത്ത് സെക്രട്ടറിമാർ ഉൾപ്പെടെയുള്ളവരും പങ്കെടുത്തു. മിക്ക പരാതികളിലും പരിഹാരം കണ്ടെത്താൻ സാധിച്ചെന്നാണ് വിവരം.