പത്തനംതിട്ട : ജില്ലാ കളക്ടറുടെ തിരുവല്ല താലൂക്ക് തല ഓൺലൈൻ അദാലത്ത് ഓഗസ്റ്റ് ഒന്നിന് നടക്കും. ജില്ലാ കളക്ടർ കളക്ടറേറ്റിൽ നിന്ന് വീഡിയോ കോൺഫറൻസിലൂടെ അക്ഷയ കേന്ദ്രങ്ങൾ മുഖേനയാണ് ജനങ്ങളുടെ പരാതികൾ കേൾക്കുന്നത്. ഇതിനായി തിരുവല്ല താലൂക്കിലുള്ള അപേക്ഷകർക്ക് ഇന്ന് മുതൽ 24 ന് വൈകുന്നേരം അഞ്ചു വരെ തിരുവല്ലയിലെ അക്ഷയകേന്ദ്രങ്ങളിൽ ഫോൺ മുഖേന രജിസ്റ്റർ ചെയ്യാം.
രജിസ്റ്റർ ചെയ്യുന്ന അപേക്ഷയും അപേക്ഷകന്റെ ഫോൺ നമ്പരും അക്ഷയ കേന്ദ്രം രേഖപ്പെടുത്തണം. വീഡിയോ കോൺഫറൻസിന്റെ സമയം അപേക്ഷകരുടെ ഫോണിൽ സംരംഭകൻ അറിയിക്കും. തുടർന്ന് ഓരോ പരാതിക്കാരനും തങ്ങൾക്ക് നിർദേശിച്ചിരിക്കുന്ന സമയത്ത് വീഡിയോ കോൺഫറൻസിൽ പങ്കെടുക്കുന്നതിന് അക്ഷയ കേന്ദ്രത്തിൽ എത്തണം. ജില്ലാ കളക്ടറോട് വീഡിയോ കോൺഫറൻസിലൂടെ പൊതുജനങ്ങൾ ബോധിപ്പിക്കുന്ന പരാതികൾ ഇആപ്ലിക്കേഷൻ വഴി സമർപ്പിക്കുന്നതിനുള്ള സൗകര്യവും അക്ഷയ കേന്ദ്രങ്ങളിലുണ്ട്.
ജില്ലകളിൽ നടത്തിവരുന്ന പൊതുജനപരാതിപരിഹാര അദാലത്തുകൾ കൊവിഡ് 19ന്റെ പശ്ചാത്തലത്തിൽ ഓൺലൈനിൽ സംഘടിപ്പിക്കുന്നതിന്റെ സാധ്യത പരിശോധിക്കണമെന്ന മുഖ്യമന്ത്രിയുടെ നിർദേശത്തെ തുടർന്നാണ് ഓൺലൈൻ പരാതിപരിഹാര സംവിധാനം ഏർപ്പെടുത്തിയത്.
വീഡിയോ കോൺഫറൻസിൽ പങ്കെടുക്കുന്നതിന് അനുവദിച്ചിട്ടുള്ള സമയത്ത് മാത്രമേ പരാതിക്കാരൻ എത്താൻ പാടുള്ളൂ. കൊവിഡ് 19 പ്രതിരോധപ്രവർത്തനങ്ങളുമായി ബന്ധപ്പെട്ട എല്ലാ സർക്കാർ നിർദേശങ്ങളും പാലിച്ചായിരിക്കും ഓൺലൈൻ പരാതിപരിഹാര അദാലത്ത് സംഘടിപ്പിക്കുന്നത്. ഇതുമായി ബന്ധപ്പെട്ട ഉദ്യോഗസ്ഥർ അവരവരുടെ ഓഫീസുകളിൽ നിന്ന് വീഡിയോ കോൺഫറൻസിൽ പങ്കെടുക്കണം.