പത്തനംതിട്ട : കേരള ഫോക് ലോർ അക്കാഡമിയുടെ 2018ലെ അവാർഡുകൾ പ്രഖ്യാപിച്ചപ്പോൾ ഇലന്തൂർ പടയണിയിൽ നിന്ന് രണ്ട് കലാകാരന്മാർക്ക് അവാർഡുകൾ ലഭിച്ചു, നാടൻ കലാരംഗത്തെ പ്രവർത്തനങ്ങൾക്ക് പ്രോത്സാഹനമായി സർക്കാർ നൽകിവരുന്ന ഫോക് ലോർ അക്കാഡമിയുടെ അവാർഡ് കെ.അശോക് കുമാറിന് ലഭിച്ചു. പ്രകൃതിയുടെ മുഖം പാളക്കോലങ്ങളിൽ, പടേനിയിലെ കാണാപ്പുറങ്ങൾ, കാലൻകോലത്തിന്റെ അർത്ഥതലങ്ങൾ തുടങ്ങിയ പടയണിയെ ആസ്പദമാക്കിയ ഗ്രന്ഥങ്ങൾ രചിച്ചിട്ടുണ്ട്. പടയണിപ്പാട്ടുകളിൽ വ്യക്തിമുദ്ര പതിപ്പിച്ച അശോക് കുമാർ ഇലന്തൂർ ശ്രീദേവി പടയണിസംഘത്തിന്റെ പ്രസിഡന്റായി കഴിഞ്ഞ 15 വർഷമായി പ്രവർത്തിച്ചുവരുന്നു. കേരളത്തിലെ നിരവധി ക്ഷേത്രങ്ങളിലും സാംസ്‌കാരിക മേഖലകളിലും, സ്‌കൂൾ, കോളേജുകളിലും പടയണി അവതരിപ്പിക്കാനും പരിചയപ്പെടുത്തുന്നതിനും ഇദ്ദേഹം നേതൃത്വം നൽകിവരുന്നു.
കേരള ഫോക് ലോർ അക്കാഡമിയുടെ 2018 യുവപ്രതിഭാ പുരസ്‌കാരം ഇലന്തൂർ പടയണിയിലെ അനീഷ് വി നായർക്ക് ലഭിച്ചു. സർക്കാരിന്റെ വജ്രജൂബിലി ഫെലോഷിപ്പ് അംഗവും പരിസ്ഥിതി പ്രവർത്തകനുമായ അനീഷിന്റെ നേതൃത്വത്തിൽ സഹസ്രവൃക്ഷായനം എന്ന പദ്ധതിയിലൂടെ തിരുവനന്തപുരം മുതൽ കാസർകോട് വരെയുള്ള ആരാധനാലയങ്ങളുടെ പരിസരങ്ങളിൽ ഔഷധ സസ്യങ്ങൾ നടുന്നുണ്ട്.