പത്തനംതിട്ട- ജില്ലാ പഞ്ചായത്തിന്റെയും വെച്ചൂച്ചിറ ഗ്രാമപഞ്ചായത്തിന്റെയും സംയുക്ത ആഭിമുഖ്യത്തിൽ സുഭിക്ഷ കേരളം പദ്ധതിയുടെ ഭാഗമായി ഗ്രാമപഞ്ചായത്തിലെ 15 വാർഡുകളിലായി രണ്ടുലക്ഷം വാഴവിത്ത് വിതരണം ആരംഭിച്ചു. ജില്ലാ പഞ്ചായത്തിന്റെ 35 ലക്ഷം രൂപയും ഗ്രാമപഞ്ചായത്തിന്റെ ഒരു ലക്ഷം രൂപയും വിനിയോഗിച്ചാണ് ഞാലിപ്പൂവൻ, പൂവൻ വാഴവിത്തുകളുടെ വിതരണം നടത്തുന്നത്. ബുധനാഴ്ച ഗ്രാമപഞ്ചായത്തിലെ ആറ്, ഏഴ്, പത്ത് വാർഡുകളിൽ വാഴവിത്തുകൾ വിതരണം നടത്തി. പത്താം വാർഡിലെ വാഴ വിത്തുകളുടെ വിതരണം ഗ്രാമപഞ്ചായത്ത് അംഗങ്ങളായ കെ.ശ്രീകുമാർ, ടി.പി അനിൽകുമാർ എന്നിവർ ചേർന്ന് ഉദ്ഘാടനം ചെയ്തു. ആറാം വാർഡിലെ വാഴ വിത്തുകളുടെ വിതരണ ഉദ്ഘാടനം വാർഡ് അംഗം നിഷ അലക്സും ഏഴാം വാർഡിലെ വിതരണം വാർഡ് അംഗം വക്കച്ചൻ പൗവ്വത്തും നിർവ്വഹിച്ചു. വരുന്ന ഒരാഴ്ചക്കുള്ളിൽ ഗ്രാമപഞ്ചായത്തിലെ എല്ലാ ഗുണഭോക്താക്കൾക്കും വാഴ വിത്തുകൾ ലഭ്യമാക്കാനാണ് ഗ്രാമപഞ്ചായത്ത് അധികൃതർ ലക്ഷ്യമിടുന്നത്.