പത്തനംതിട്ട : ജില്ലയിൽ ഇന്നലെ 59 പേർക്ക് കൊവിഡ്19 സ്ഥിരീകരിച്ചു.
രോഗം സ്ഥിരീകരിച്ചവരിൽ 13 പേർ വിദേശ രാജ്യങ്ങളിൽ നിന്ന് വന്നവരും, എട്ടു പേർ മറ്റ് സംസ്ഥാനങ്ങളിൽ നിന്നും വന്നവരും, 38 പേർ സമ്പർക്കത്തിലൂടെ രോഗം ബാധിച്ചവരുമാണ്. ഇതിൽ കുമ്പഴ ക്ലസ്റ്ററിലുളള 13 പേരും അടൂർ ക്ലസ്റ്ററിലുളള 15 പേരും ചങ്ങനാശേരി ക്ലസ്റ്ററിലുളള ഒരാളും നാല് ഹെൽത്ത് കെയർ വർക്കർമാരും മൂന്നു പൊലീസ് വിഭാഗത്തിലുളളവരും ഉണ്ട്. ജില്ലയിൽ ഇതുവരെ ആകെ 1319 പേർക്ക് രോഗം സ്ഥിരീകരിച്ചിട്ടുണ്ട്. ഇതിൽ 499 പേർ സമ്പർക്കം മൂലം രോഗം സ്ഥിരീകരിച്ചവരാണ്. ജില്ലയിൽ ഇന്നലെ 44 പേർ രോഗമുക്തരായി. ആകെ രോഗമുക്തരായവരുടെ എണ്ണം 960 ആണ്. പത്തനംതിട്ട ജില്ലക്കാരായ 357 പേർ രോഗികളായിട്ടുണ്ട്. ഇതിൽ 343 പേർ ജില്ലയിലും, 14 പേർ ജില്ലയ്ക്ക് പുറത്തും ചികിത്സയിലാണ്.
പത്തനംതിട്ട ജനറൽ ആശുപത്രിയിൽ 110 പേരും കോഴഞ്ചേരി ജില്ലാ ആശുപത്രിയിൽ 65 പേരും, അടൂർ ജനറൽ ആശുപത്രിയിൽ ആറു പേരും, റാന്നി മേനാംതോട്ടം സി.എഫ്.എൽ.ടി.സിയിൽ 57 പേരും, പന്തളം അർച്ചന സി.എഫ്.എൽ.ടി.സിയിൽ 22 പേരും, ഇരവിപേരൂർ കൊട്ടയ്ക്കാട്ട് സി.എഫ്.എൽ.ടി.സിയിൽ 24 പേരും, കോഴഞ്ചേരി മുത്തൂറ്റ് നഴ്സിംഗ് കോളജ് സി.എഫ്.എൽ.ടി.സിയിൽ 58 പേരും ഐസൊലേഷനിൽ ഉണ്ട്. കൂടാതെ തിരുവല്ല ഹോളി സ്പിരിറ്റ് കോൺവെന്റിൽ 15 പേരും ഐസൊലേഷനിൽ ഉണ്ട്.
സ്വകാര്യ ആശുപത്രികളിൽ ഒൻപതു പേർ ഐസൊലേഷനിൽ ഉണ്ട്. ജില്ലയിൽ ആകെ 366 പേർ വിവിധ ആശുപത്രികളിൽ ഐസോലേഷനിൽ ആണ്. ഇന്ന് പുതിയതായി 59 പേരെ ഐസൊലേഷനിൽ പ്രവേശിപ്പിച്ചു. ജില്ലയിൽ 3348 കോൺടാക്ടുകൾ നിരീക്ഷണത്തിൽ ഉണ്ട്.