കൊല്ലം: കരുനാഗപ്പള്ളി വവ്വാക്കാവിൽ യുവാവിനെ ഏഴംഗ സംഘം വീട് കയറി ആക്രമിച്ചു. അക്രമത്തിൽ ഗുരുതരമായി പരിക്കേറ്റ കുലശേഖരപുരം കടത്തൂർ കുന്നേൽ വടക്കതിൽ സലീമിന്റെ മകൻ ഹുസൈനെ(26) ആലപ്പുഴ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. വലിയ ചുറ്റിക, കൈക്കോടാലി എന്നിവ ഉപയോഗിച്ച് മുൻവശത്തെ വാതിൽ തകർത്ത്, വീടിനുള്ളിൽ കയറിയ അക്രമിസംഘം ചുറ്റിക ഉപയോഗിച്ച് ഹുസൈന്റെ കാൽപ്പാദം അടിച്ചൊടിക്കുകയും,വടിവാൾകൊണ്ട് വെട്ടി പരിക്കേൽപ്പിക്കുകയും ചെയ്തു.

ഹുസൈന്റെ പിതാവ് സലീം,സലീമിന്റെ മാതാവ്, മകൾ എന്നിവർ വീട്ടിലുണ്ടായിരുന്നെങ്കിലും മാരക ആയുധങ്ങൾ കാാണിച്ച് ഭയപ്പെടുത്തി ഇവരെ നിശബ്ദരാക്കുയായിരുന്നു. കരുനാഗപ്പള്ളിയിലെ ഒരു ബാറിൽ നടന്ന സംഘർഷവുമായി ബന്ധപ്പെട്ട് റിമാൻഡിലായിരുന്ന ഹുസൈൻ എതാനും ദിവസം മുൻപാണ് പുറത്തിറങ്ങിയത്. സമീപ വീടുകളിലെ സി.സി.ടി വിദൃശ്യങ്ങൾ ശേഖരിച്ച് കരുനാഗപ്പള്ളി പൊലീസ് പ്രതികൾക്കായി അന്വഷണം ആരംഭിച്ചു.