കൊല്ലം: അച്ചൻകോവിൽ പഞ്ചായത്തിൽ ഇറച്ചിക്കച്ചവടത്തിന്റെ മറവിൽ മദ്യവിൽപ്പന നടത്തിയയാളെ പൊലീസ് അറസ്റ്റ് ചെയ്‌തു. ആര്യങ്കാവ് പഞ്ചായത്തിലെ ഇടപ്പാളയം പളളിമുക്ക് ശ്രീലക്ഷ്മി ഭവനിൽ രമേശി(40)നെയാണ് അച്ചൻകോവിൽ പൊലീസ് അറസ്റ്റ് ചെയ്തത്. കഴുതുരുട്ടിയിൽ നിന്നും ജീപ്പിൽ പ്രിയ എസ്റ്റേറ്റ് വനപാത വഴി അച്ചൻകോവിലിൽ വിൽക്കാനുള‌ള ഇറച്ചിക്കൊപ്പം ഇയാൾ ഒളിപ്പിച്ച് കടത്തുകയായിരുന്ന അഞ്ച് ലിറ്റർ മദ്യം പൊലീസ് പിടിച്ചെടുത്തു.
തെന്മല ബിവറേജസ് കോർപ്പറേഷന്റെ വിദേശമദ്യചില്ലറവിൽപ്പന ശാലയിൽ നിന്നും വാങ്ങുന്ന മദ്യം ഇറച്ചി വ്യാപാരത്തിന്റെ മറവിൽ അച്ചൻകോവിലും സമീപ പ്രദേശങ്ങളിലും ജീപ്പിൽ എത്തിച്ച് അനധികൃത കച്ചവടം നടത്തിവരികയായിരുന്നു ഇയാളെന്ന് പൊലിസ് പറയുന്നു. മദ്യം കടത്താനുപയോഗിച്ച ജീപ്പ് പൊലിസ് കസ്റ്റഡിയിൽ എടുത്തിട്ടുണ്ട്. പ്രതിയെ കൊവിഡ് പരിശോധനക്ക് ശേഷം കോടതിയിൽ ഹാജരാക്കി. എസ്.ഐ.മാരായ ഹരീഷ്, ശ്രീകൃഷ്ണ കുമാർ, ഷാജി, സി.പി.ഒ.ശിവദാസ് എന്നിവരുടെ നേതൃത്വത്തിലായിരുന്നു അറസ്റ്റ്.