ആകാശം മുട്ടെ ഉയരമുള്ള മരത്തിനു മുകളിൽ വീട് വച്ച് താമസിക്കുന്ന ഒരു ജനതയുണ്ട് ഇന്തോനേഷ്യൻ വാനന്തരങ്ങളിൽ. 1970 വരെ പുറം ലോകത്തിന് അറിയാതെ കാടുകളിൽ അദൃശ്യരായാണ് ഇവർ കഴിഞ്ഞിരുന്നത്. കൊറൊവായ് എന്ന ഈ ജനവിഭാഗത്തിന്റെ ജീവിതം പുറം ലോകത്തിന് എന്നും വിചിത്രമായാണ് തോന്നുന്നത്. നമ്മുടെ സിവിൽ എൻജിനീയറിംഗ് വിദഗ്ധരെപ്പോലും തോൽപ്പിക്കുന്ന തരത്തിലാണ് ഇവരുടെ വീടുകൾ. എറിക്ക് ബാസെക എന്ന ഫോട്ടോഗ്രാഫർ 2000ൽ ഇവരെ സന്ദർശിച്ചതോടെയാണ് പുറംലോകത്തിന് ഇവരെ കുറിച്ചു കൂടുതൽ വിവരങ്ങൾ ലഭിച്ചു തുടങ്ങിയത്.
ആറുമുതൽ 12 മീറ്റർ വരെ ഉയരത്തിലാണ് സാധാരണ കൊറൊവായ് വീടുകൾ നിർമിക്കുന്നത്. ചിലതിന് തറ നിരപ്പിൽ നിന്നും 35 മീറ്റർ വരെ ഉയരമുണ്ടാകും. നല്ല ഉറപ്പുള്ള ഒരു മരത്തിനു മുകളിലാണ് സാധാരണ വീടുകൾ നിർമ്മിക്കുന്നത്. പക്ഷേ വീടിന്റെ അടിത്തറയ്ക്ക് താങ്ങായി നിരവധി മരങ്ങളുണ്ടാകും. ഒപ്പം കൂടുതൽ സുരക്ഷയ്ക്കായി മരത്തിന്റെ ഉയരങ്ങളുമുണ്ടാകും.

ബനിയൻ മരമാണ് കൂടുതലായും ഉപയോഗിക്കുന്നത്. മരത്തിന്റെ മുകൾ ഭാഗം മുറിച്ച് നീക്കുന്നു. ഇതിന് മുകളിൽ ശിഖരം ഉപയോഗിച്ച് തറ നിർമിക്കും, അതിനുശേഷം സാഗോ പന ഉപയോഗിച്ച് തറ ഭാഗത്തിന്റെ മുകൾ ഭാഗം മോടിപിടിപ്പിക്കുന്നു.ചുമരും,മേൽക്കൂരയും ഇതേ പനയുടെ ഇല ഉപയോഗിച്ച് മറയ്ക്കുന്നു. മരം ഉപയോഗിച്ച് തന്നെ നിർമിക്കുന്ന ശക്തമായ കോവണിയിലാണ് ഇവർ മരമുകളിലെ വീട്ടിലേയ്ക്ക് കയറുന്നത്.

കൊതുകുകളിൽ നിന്നും വന്യമൃഗങ്ങളിൽ നിന്നും സംരക്ഷണം നേടാൻ മാത്രമല്ല ഈ വീടുകൾ. പ്രേത, പിശാചുക്കളിൽ നിന്നും, പുറംലോകത്തിന്റെ കണ്ണിൽപെടാതിരിക്കാനും ഈ വീടുകൾ കൊറൊവക്കാരെ സഹായിക്കുന്നു എന്നാണ് വിശ്വാസം. മരങ്ങളോടിണങ്ങിയുള്ള ജീവിതം ഈ ജന വിഭാഗത്തിന്റെ പ്രധാന സവിശേഷത. അതിനാൽ തന്നെ എത്ര ഉയരത്തിലുള്ള മരവും സ്ത്രീകളും കുട്ടികളും അടക്കമുള്ളവർ അനായാസേന കയറിപ്പോകും.

കൊറവായ് വിഭാഗക്കാർ നരഭോജികളാണെന്നാണ് നിഗമനം. ഇവരുടെ അജ്ഞാതവാസത്തിനു കാരണം ഇതുതന്നെയാണെന്നും കരുതപ്പെടുന്നു. എങ്കിലും വനവിഭവങ്ങൾ അടക്കമുള്ളവയും ഇവർ ഭക്ഷണമായി ഉപയോഗിക്കുന്നുണ്ട്. കൂട്ടമായാണ് ഇവർ വീട് വയ്ക്കുന്നതും അതിൽ താമസിയ്ക്കുന്നതും. വീടിന്റെ ഒരു ഭാഗം പുരുഷൻമാർക്കും മറ്റൊരു ഭാഗം സ്തീകൾക്കുമായാണ് ക്രമീകരിക്കുന്നത്.