മലയാളികൾ ഉൾപ്പെടെ കൂടുതൽ പേർ വിനോദയാത്രയ്ക്കായി തിരഞ്ഞെടുക്കുന്ന വിദേശരാജ്യമാണ് തായ്‌ലൻഡ്. എന്നാൽ നമ്മളിൽ പലർക്കും അറിയാത്ത ചില വ്യത്യസ്തമായ കാര്യങ്ങളും അവിടെയുണ്ട്. തായ്‌ലൻഡിൽ പട്ടായയിലും മറ്റും പോയി അടിച്ചുപൊളിച്ചു രസിച്ചു കഴിഞ്ഞു തിരികെ നാട്ടിലേക്ക് വരുന്നതിനു മുൻപ് ഒരു ദിവസം ഏകാന്തനായി ജയിലിൽ കിടക്കുവാൻ ആഗ്രഹമുണ്ടോ? അങ്ങനെ ആർക്കെങ്കിലും ആഗ്രഹം കാണുമോ? എന്നാൽ, അതിനുള്ളള സൗകര്യം ഇവിടെെയുണ്ട്.
പക്ഷേ, ഇത് ഒറിജിനൽ ജയിൽ അല്ല എന്നു മാത്രം. ജയിൽ മോഡലിൽ തയ്യാറാക്കിയിരിക്കുന്ന ഒരു ഹോട്ടലാണ്. തായ്‌ലൻഡ് തലസ്ഥാനമായ ബാങ്കോക്കിലാണ് ഇത്തരത്തിൽ വ്യത്യസ്തമായ ഒരു ഹോട്ടൽ പ്രവർത്തിക്കുന്നത്.
സംഭവം കേൾക്കുമ്പോൾ തമാശയായി തോന്നുമെങ്കിലും ഹോട്ടലിലെ മുറികൾ കണ്ടാൽ ശരിക്കും ഞെട്ടിപ്പോകും. ജയിൽ മുറികളെപ്പോലെ തന്നെയാണ് അവിടമാകെ സജ്ജീകരിച്ചിരിക്കുന്നത്. ഹോളിവുഡ് സിനിമകളിൽ മാത്രം കണ്ടുശീലിച്ചിട്ടുള്ള തരത്തിലുള്ള ജയിലുകൾ. തായ്‌ലൻഡ് സ്വദേശികളായ സിറ്റിചായും ഭാര്യ പിയാനത്തും ചേർന്നാണ് ഇത്തരമൊരു വ്യത്യസ്തമായ സംരംഭം തുടങ്ങുന്നത്. ഏകാന്തതയുടെ കഥ പറയുന്ന ഒരു ഹോളിവുഡ് ചിത്രം കണ്ട് ഈ ദമ്പതികൾ വളരെയേറെ ആകൃഷ്ടരാകുകയുണ്ടായി. അങ്ങനെയാണ് ഇത്തരത്തിലൊരു ഹോട്ടൽ ആരംഭിക്കുവാൻ ഇവർക്ക് ഐഡിയ ലഭിക്കുന്നത്. ആ ചിത്രത്തിലെ പോലെയുള്ള ജയിൽ റൂമുകളാണ് ഇവർ ഹോട്ടലിൽ സെറ്റ് ചെയ്തിരിക്കുന്നത്. ജീവിതത്തിൽ ഒരിക്കലെങ്കിലും തടവറയുടെ ഏകാന്തത അനുഭവിച്ചറിയണം എന്നാണ് ഹോട്ടലുടമകളായ ഈ ദമ്പതിമാർ പറയുന്നത്.
മൊത്തം നാലു നിലകളാണ് ഹോട്ടലിനുള്ളത്. അകത്തേക്ക് ആളുകൾ കയറിക്കഴിഞ്ഞാൽ വലിയ വാതിൽ അടയും. പിന്നീട് നിങ്ങൾ ശരിക്കും ഒരു ജയിലിൽ എന്നപോലെ കഴിയുകയാണ്. കാര്യം ജയിൽ മോഡൽ ആണെങ്കിലും ഇവിടെ താമസിക്കുവാനെത്തുന്ന അതിഥികളെ ഹോട്ടലുകാർ നല്ല രീതിയിൽ സത്കരിക്കും.
ഇവിടെ താമസിക്കുവാൻ കയറുന്നതിനു മുൻപ് ജയിലുകളിൽ ചെയ്യുന്നതു പോലെ പൊക്കവും തൂക്കവും എല്ലാം അളക്കുകയും പൊലീസ് രേഖകളിൽ സൂക്ഷിച്ചു വച്ചിട്ടുള്ള കുറ്റവാളിയുടെ ഫോട്ടോ പോലെ ഒരെണ്ണം നിങ്ങളെ നിർത്തി എടുക്കുകയും ചെയ്യും. അതിനുശേഷം ജയിലുകളിലേതു പോലത്തെ വെളുപ്പിൽ കറുത്ത വരകളുള്ള (സീബ്രാ മോഡൽ) യൂണിഫോം ധരിക്കുവാൻ നൽകും. ഒപ്പംതന്നെ ഈ ജയിലിലെ താമസത്തെക്കുറിച്ചുള്ളതും പാലിക്കേണ്ടതുമായ ചില നിർദ്ദേശങ്ങൾ അധികൃതർ നൽകും.
ഈ ഹോട്ടലിലെ താമസമൊക്കെ കഴിഞ്ഞു ചെക്ക്-ഔട്ട് ചെയ്യുന്ന സമയത്ത് നിങ്ങൾ അവിടെ താമസിച്ചു എന്നു കാണിച്ചു കൊണ്ടുള്ള ഒരു ‘ക്രിമിനൽ റെക്കാഡ്’ തരും. അതുപോലെ നിങ്ങൾ ധരിച്ച വസ്ത്രങ്ങൾ ഇഷ്ടപ്പെട്ടാൽ വേണമെങ്കിൽ അവ വിലകൊടുത്തു സ്വന്തമായി വാങ്ങുകയും ചെയ്യാം.
ബാങ്കോക്ക് എയർപോർട്ടിൽ നിന്നും ഏകദേശം 37 കിലോമീറ്റർ ദൂരത്തായാണ് ഈ ജയിൽ ഹോട്ടൽ സ്ഥിതി ചെയ്യുന്നത്.