ചാവക്കാട്: തീരമേഖലയിലെ കടലാക്രമണങ്ങളെ പ്രതിരോധിക്കുന്നതിനായി എടക്കഴിയൂർ പഞ്ചവടി കടലോരത്ത് ബുള്ളറ്റ് വുഡ് തൈകൾ നട്ടു. ആൻഡമാൻ നിക്കോബാർ ദീപുകളിൽ വ്യാപകമായി വളരുന്ന ചെടിയാണിത്.
വനമഹോത്സവം സമാപനത്തിന്റെ ഭാഗമായി വനം വന്യജീവി വകുപ്പ് തൃശൂർ സാമൂഹിക വനവത്കരണ വിഭാഗവും, ജൈവ വൈവിദ്ധ്യ പരിസ്ഥിതി സംഘടനയായ ഗ്രീൻഹാബിറ്റാറ്റും കലാകായിക സാംസ്‌കാരിക വേദിയായ ന്യൂഫ്രണ്ട്‌സ് ഗ്രൂപ്പ് എടക്കഴിയൂരും സംയുക്തമായാണ് മുപ്പതോളം തൈകൾ നട്ടത്.
ജില്ലാ വനമഹോത്സവ സമാപനത്തിന്റെ ഭാഗമായി പുന്നയൂർ പഞ്ചായത്ത് പ്രസിഡന്റ് ബുഷ്റ കുന്നമ്പത്ത് പഞ്ചവടി കടൽ തീരത്ത് വൃക്ഷത്തൈ നട്ട് ഉദ്ഘാടനം ചെയ്തു. സോഷ്യൽ ഫോറസ്ട്രി എക്‌സ്റ്റൻഷൻ എറണാകുളം എ.സി.എഫ് ബി. ജയചന്ദ്രൻ നായർ പദ്ധതി വിശദീകരിച്ചു. സെക്‌ഷൻ ഫോറസ്റ്റ് ഓഫീസർ യു. സജീവ് കുമാർ വൃക്ഷത്തൈ വിതരണം നടത്തി.
ഗ്രീൻ ഹാബിറ്റാറ്റ് എക്‌സിക്യൂട്ടിവ് ഡയറക്ടർ എൻ.ജെ. ജയിംസ്, ടർട്ടിൽ ഫീൽഡ് ഓഫീസർ സലീം ഐഫോക്കസ്, അഷറഫ് മൂത്തേടത്ത്, എം.കെ. ഷഹർബാൻ, ഷാനു അസീസ്, ടി.എച്ച്. ഇജാസ്, ന്യൂ ഫ്രണ്ട്‌സ് ഗ്രൂപ്പ് അംഗങ്ങളായ മുൻഫീർ, ഉസ്മാൻ, ഷറഫുദ്ദീൻ, സൽമാൻ, ഉമ്മർ, രാഗേഷ് എന്നിവർ പങ്കെടുത്തു.
ബുള്ളറ്റ് വുഡ് ചെടികൾ
ആൻഡമാൻ കടൽ തീരങ്ങളെ കാലങ്ങളായി സുനാമി, കടൽ ക്ഷോഭം എന്നിവയിൽ നിന്നും ഈ മരങ്ങളാണ് സംരക്ഷിക്കുന്നത്. മണൽത്തിട്ടകളെ വേരുപടലങ്ങൾ കൊണ്ട് ബലപ്പെടുത്തി വൻ വൃക്ഷങ്ങളായി വളരുന്ന ഇവയുടെ തടി കാലങ്ങളോളം ദ്രവിക്കാതെ നിലനിൽക്കും. കായകളും, ഇലകളും ജലജീവികളുടെ ഇഷ്ട ഭക്ഷണമാണ്.
വനം വന്യജീവി വകുപ്പ് തൈകൾ വച്ചുപിടിപ്പിക്കുന്നത് 8 ഭാഗങ്ങളിൽ
കേരളത്തിലെ കടൽത്തീരങ്ങളിൽ ഇത്തരമൊരു പരീക്ഷണം ആദ്യം