തൃശൂർ: പാകമായ നേന്ത്രക്കായകളിൽ കറുത്തതും തവിട്ടു നിറത്തിലുള്ളതുമായ സൂചിക്കുത്തുകൾ. ടിഷ്യു കൾച്ചർ വാഴകളുടെ തണ്ടിലും ഇലകളിലും തവിട്ട് - മഞ്ഞ നിറങ്ങളിൽ പുള്ളിക്കുത്തുകൾ. നേന്ത്രൻ കുലകളുടെ വാണിജ്യ സാദ്ധ്യതകളിൽ മങ്ങലേൽപ്പിക്കുന്നതാണ് കുഴുപ്പുള്ളി എന്ന പുതിയ രോഗം. വാഴക്കർഷകരുടെ പ്രതീക്ഷകളിൽ കണ്ണീര് വീഴ്ത്തുകയാണ് കുഴുപ്പുള്ളി രോഗം. എറണാകുളത്ത് ആലങ്ങാട് പഞ്ചായത്തിൽപെട്ട രണ്ട് കർഷകരുടെ തോട്ടങ്ങളിൽ ഈ രോഗം വ്യാപകമാണ്. സമീപത്തെ കരുമാലൂർ പഞ്ചായത്തിലും രോഗം വ്യാപിച്ചിട്ടുണ്ട്.

കീടരോഗ ബാധകളും കാലാവസ്ഥാ വ്യതിയാനവും നേന്ത്രക്കൃഷിയെ സാരമായി ബാധിക്കാറുണ്ട്. പിണ്ടിപ്പുഴുവും മാണപ്പുഴുവും വാഴയുടെ മുഖ്യശത്രു കീടങ്ങളാകുമ്പോൾ, ഇലപ്പുള്ളിയും പനാമ വാട്ടവും മാണമഴുകലും രോഗങ്ങൾ ശല്യം ചെയ്യുമ്പോഴുമാണ് പുതിയ രോഗവും പ്രശ്നം സൃഷ്ടിക്കുന്നത്. നെൽച്ചെടിയെ ബാധിക്കുന്ന ബ്ലാസ്റ്റ്‌ രോഗത്തിന് ഹേതുവായ പൈറിക്കുലേറിയ എന്ന കുമിളിന്റെ കുടുംബത്തിലും ഗണത്തിലുംപെട്ട മറ്റൊരു കുമിളായ പൈറിക്കുലേറിയ അംഗുലേറ്റയാണ് വാഴയിലെ പുതിയരോഗത്തിന് കാരണക്കാരൻ.

രോഗലക്ഷണങ്ങൾ

ടിഷ്യൂകൾച്ചർ നഴ്‌സറികളിൽ

നഴ്‌സറികളിലുള്ള ടിഷ്യൂകൾച്ചർ വാഴത്തൈകളുടെ ഇലകളിലും ഇളംതണ്ടുകളിലും ദീർഘവൃത്താകൃതിയിലുള്ള തവിട്ട് നിറത്തിലും ചുറ്റും മഞ്ഞ നിറവുമുള്ള പുള്ളികൾ കാണപ്പെടുന്നു. നിയന്ത്രണ മാർഗ്ഗങ്ങൾ സ്വീകരിക്കാതിരുന്നാൽ രോഗം മൂർച്ഛിച്ച്‌ തൈകൾ ഉണങ്ങിക്കരിയും.

തോട്ടങ്ങളിൽ

തോട്ടങ്ങളിലെ വാഴകളുടെയും കന്നുകളുടെയും പുതിയ ഇലകളിലും തണ്ടുകളിലും കുലയുടെ നാവിലയിലും തവിട്ടു നിറത്തിലുള്ള പുള്ളിക്കുത്തുകൾ പ്രത്യക്ഷപ്പെടും. തുടർന്ന് കുലയുടെ തണ്ടിലും അവസാന ഘട്ടങ്ങളിൽ കായകളുടെ തൊലിയെയും സാരമായി ബാധിക്കും.

കുലകളിൽ

കുലകളിലെ പാകമായ കായ്കളിൽ സൂചി കുത്തിയ പാടുകൾ കാണുകയും പിന്നീട് അവ ചുവപ്പു കലർന്ന തവിട്ടു നിറത്തിലുള്ള പുള്ളികളായി രൂപാന്തരപ്പെടും. മദ്ധ്യഭാഗത്ത് അധികം താഴ്ച്ചയില്ലാത്ത കുഴികൾ രൂപപ്പെടും. ആക്രമണം മൂർച്ഛിക്കുന്നതനുസരിച്ച് പുള്ളികൾ കൂടിച്ചേർന്ന് കായ്കൾ വിണ്ടുകീറി ഭംഗി നഷ്ടപ്പെടും. വിണ്ടുകീറിയ ഈ കായ്കളിൽ കായീച്ചയും പഴയീച്ചയും മുട്ടയിട്ട് അവയുടെ പുഴുക്കൾ ആഹരിക്കുന്നത് വഴി പൂർണ്ണമായി നശിച്ചുപോകും.

ഇനങ്ങൾ

നേന്ത്രൻ, ഗ്രാന്റ് നെയ്ൻ, പൂവൻ (രസ്താളി), ഞാലിപ്പൂവൻ (നെയ്പ്പൂവൻ) ഇനങ്ങളെയാണ് ബാധിക്കുക. 2019 മുതലാണ് ഈ രോഗം ബാധിക്കാൻ തുടങ്ങിയത്. പുതുക്കാട്‌ മേഖലയിൽ നിന്നും രോഗം റിപ്പോർട്ട് ചെയ്തിട്ടുണ്ട്.

നിയന്ത്രണ മാർഗ്ഗങ്ങൾ

രോഗമുക്തമാണെന്ന് ഉറപ്പുള്ള ടിഷ്യൂകൾച്ചർ വാഴതൈകൾ മാത്രം ഉപയോഗിക്കുക

പോളി എത്തിലീൻ കവറുകൾ ക്കൊണ്ട് കുലകൾ പൊതിയുന്നത് വഴി കൂമ്പിലയിലേയും വാഴക്കുലത്തണ്ടിലേയും കുമിൾ രേണുക്കൾ കുലകളിലേക്ക് പകരുന്നത് പൂർണ്ണമായും തടയാം

രോഗം ബാധിച്ച് ഉണങ്ങിയ ഇലകൾ സമയബന്ധിതമായി മുറിച്ച് തോട്ടത്തിൽ നിന്നും നീക്കി തീയിട്ട് നശിപ്പിക്കുക