തൃശൂർ: കൊവിഡ് പ്രതിരോധ പ്രവര്‍ത്തനം ശക്തിപ്പെടുത്തുന്നതിനായി വാർ‍ഡ് സമിതികൾ, റാപ്പിഡ് റെസ്പോൺസ് ടീമുകൾ, ഫസ്റ്റ് ലൈന്‍ ട്രീറ്റ്മെന്റ് സെന്ററുകൾ എന്നിവയുടെ പ്രവർത്തനങ്ങളുമായി ബന്ധപ്പെട്ട് മന്ത്രിമാരായ എ.സി മൊയ്തീൻ, കെ.കെ ശൈലജ എന്നിവരുടെ നേതൃത്വത്തിൽ തദ്ദേശ ഭരണ ജനപ്രതിനിധികൾ, ആരോഗ്യപ്രവർത്തകർ, മറ്റ് ഉദ്യോഗസ്ഥർ എന്നിവരുടെ യോഗം വിളിച്ചു. ബുധനാഴ്ച വൈകിട്ട് മൂന്നിന് വീഡിയോ കോൺഫറൻസിംഗ് മുഖേനയാണ് യോഗം. സെക്രട്ടേറിയേറ്റിലെ അനക്സ് ഒന്നിലെ ബോധി ഹാളിൽ ക്രമീകരിച്ചിരിക്കുന്ന വീഡിയോ കോൺഫറൻസിംഗ് സൗകര്യം ഉപയോഗിച്ചായിരിക്കും മന്ത്രിമാരും വകുപ്പ് സെക്രട്ടറിമാരും മേധാവികളും പങ്കെടുക്കുക. തദ്ദേശ ഭരണ സമിതി അദ്ധ്യക്ഷന്മാർ, ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സന്മാർ, ജില്ലാ ആശുപത്രി സൂപ്രണ്ടുമാർ, പ്രാഥമിക സാമൂഹികാരോഗ്യ കേന്ദ്രങ്ങളിലെ മെഡിക്കൽ ഓഫീസർമാർ, തദ്ദേശ ഭരണ സ്ഥാപനങ്ങളിലെ സെക്രട്ടറിമാർ, സി.ഡി.എസ് ചെയർപേഴ്സന്മാർ, ഹെൽത്ത് സൂപ്പർവൈസർമാർ, ഐ.സി.ഡി.എസ് സൂപ്പർവൈസർമാർ എന്നിവർ വീഡിയോ കോൺഫറൻസിംഗിലൂടെ പങ്കെടുക്കും. സാദ്ധ്യമല്ലാത്ത പ്രദേശങ്ങളിലുള്ളവർ കമ്പ്യൂട്ടർ ഉപയോഗിച്ചോ മൊബൈൽ ഫോൺ വഴിയോ പങ്കെടുക്കണം.