ഗുരുവായൂർ: ഗുരുവായൂർ ദേവസ്വം ആനകളുടെ ആരോഗ്യ സംരക്ഷണത്തിനായി ഒരു മാസമായി നടന്നു വന്നിരുന്ന സുഖ ചികിത്സയ്ക്ക് സമാപനം. ആനക്കോട്ടയിലെ 47 ആനകളിൽ മദപ്പാടില്ലാത്ത 29 ആനകൾക്കാണ് ആദ്യഘട്ടത്തിൽ സുഖചികിത്സ നൽകിയത്. മദപ്പാടിലുള്ള ആനകൾക്ക് മദപ്പാട് കഴിയുന്ന മുറയ്ക്ക് സുഖ ചികിത്സ നൽകും. ഈ മാസം ഒന്നിനാണ് സുഖചികിത്സ തുടങ്ങിയിരുന്നത്. മൂന്ന് കിലോ അരിയുടെ ചോറ്, ഓരോ കിലോവീതം ചെറുപയറും മുതിരയും, 200 ഗ്രാം ച്യവനപ്രാശം, 100 ഗ്രാം അഷ്ടചൂർണം, 25 ഗ്രാം മിനറൽ മിക്‌സ്ചർ, 50 ഗ്രാം മഞ്ഞൾപൊടി തുടങ്ങിയവയും വൈറ്റമിൻ ടോണിക്കുകളുമായിരുന്നു ഓരോ ദിവസവും ആനകളുടെ ദൈനംദിന മെനു.

ഇതിന് പുറമെ പനമ്പട്ടയും പുല്ലും നൽകാറുണ്ട്. ആനകളുടെ ശരീര പുഷ്ടിക്കും, ഓജസിനും, അഴകിനും, ആരോഗ്യത്തിനുമായി വിദഗ്ദ്ധർ നിശ്ചയിച്ച ഔഷധക്കൂട്ടുകളും, ആരോഗ്യ വർദ്ധക വിഭവങ്ങളുമാണ് സുഖ ചികിത്സയ്ക്കായി ആനകൾക്ക് മുപ്പത് ദിവസം നൽകി വന്നിരുന്നത്. ദിവസവും വിശദമായ തേച്ചുകുളിയും സുഖചികിത്സയുടെ ഭാഗമായുണ്ടായിരുന്നു.