തിരുവനന്തപുരം: ഒാർഡിനറി ബസിലെ മിനിമം ചാർജായ 8 രൂപ നിലനിറുത്തി യാത്രാനിരക്ക് കൂട്ടാൻ ഗതാഗത വകുപ്പ് നൽകിയ ശുപാർശ മന്ത്രിസഭ അംഗീകരിച്ചു. നാളെ മുതൽ പ്രാബല്യത്തിൽ. മിനിമം ചാർജിൽ സഞ്ചരിക്കാവുന്ന ദൂരം അഞ്ച് കിലോമീറ്ററിൽ (രണ്ട് ഫെയർ സ്റ്റേജ്)​ നിന്ന് രണ്ടരയായി (ഒരു ഫെയ‌ർ സ്റ്റേജ്)​ കുറച്ചു. കിലോമീറ്റർ നിരക്ക് 70 പൈസയായിരുന്നത് 90 പൈസയാക്കി. സൂപ്പർ ക്ളാസ് ബസുകളുടെ നിരക്കിൽ 25% വർദ്ധനയും വരുത്തി. കൊവിഡ് കാലത്തേക്കാണ് ബാധകം.

വിദ്യാർത്ഥികളുടെ കൺസഷൻ ടിക്കറ്റ് മിനിമം നിരക്ക് ഒരു രൂപയിൽ നിന്ന് രണ്ടാക്കാൻ ധാരണയായെങ്കിലും അന്തിമ തീരുമാനം പിന്നീട് കൈക്കൊള്ളുമെന്ന് മന്ത്രി എ.കെ.ശശീന്ദ്രൻ വാർത്താ സമ്മേളനത്തിൽ പറഞ്ഞു. വിദ്യാർത്ഥികൾക്കുള്ള ടിക്കറ്റിൽ 30% വർദ്ധനയാണ് ശുപാർശ ചെയ്തിരുന്നത്.

ജസ്റ്റിസ് രാമചന്ദ്രൻ കമ്മിഷൻ സമർപ്പിച്ച റിപ്പോർട്ട് കഴിഞ്ഞ മാസം 26ന് ഗതാഗത മന്ത്രിയുടെ അദ്ധ്യക്ഷതയിൽ കൂടിയ യോഗം പരിഷ്കരിച്ചാണ് വ‌ർദ്ധനയ്ക്ക് രൂപം നൽകിയത്.

ശുപാർശ ചെയ്തത് രണ്ടു തരത്തിൽ

ജസ്റ്റിസ് രാമചന്ദ്രൻ കമ്മിഷൻ റിപ്പോർട്ടിൽ ബസ് ചാർജ് വർദ്ധനയ്ക്ക് രണ്ട് രീതിയാണ് ശുപാർശ ചെയ്തിരുന്നത്. ആദ്യത്തേതിൽ മിനിമം നിരക്ക് 12 രൂപ, കിലോമീറ്ററിന് 30% വ‌ർദ്ധന,​ കിലോമീറ്റർ നിരക്ക് 90 പൈസ. രണ്ടാമത്തേതിൽ മിനിമം നിരക്ക് 10 രൂപ, കിലോമീറ്ററിന് 50 % വ‌ർദ്ധന, കിലോമീറ്റർ നിരക്ക് 1.10 രൂപ. ഇതിൽ ആദ്യത്തേതിലെ കിലോമീറ്റർ നിരക്ക് അംഗീകരിച്ചു.

'കൊവിഡ് ബാധയെ തുടർന്ന് യാത്രക്കാർ കുറ‌ഞ്ഞതും നിന്നുള്ള യാത്ര വിലക്കിയതും ഡീസൽ വിലയിലെ വൻ വർദ്ധനയുമാണ് ബസ് ചാർജ് കൂട്ടാൻ കാരണമായത്".

-മന്ത്രി എ.കെ.ശശീന്ദ്രൻ