തിരുവനന്തപുരം: ജില്ലാ ഒളിമ്പിക് അസോസിയേഷൻ സ്‌റ്റാച്യൂ ചിറക്കുളം റോഡിലെ ഓഫീസിന്റെ പ്രവർത്തനോദ്ഘാടനം കേരള ഒളിമ്പിക് അസോസിയേഷൻ സംസ്ഥാന പ്രസിഡന്റ് വി. സുനിൽ കുമാർ നിർവഹിച്ചു. ചടങ്ങിനോടനുബന്ധിച്ച് നടന്ന അന്താരാഷ്ട്ര ഒളിമ്പിക് ദിനാചരണം ജില്ലാ അസോസിയേഷൻ ചെയർമാൻ കെ.എസ്. ബാലഗോപാൽ ഉദ്ഘാടനം ചെയ്തു. ഒളിമ്പിക് ദിനാചരണത്തിന്റെ ഭാഗമായി ആരോഗ്യ പ്രവർത്തകർ, പൊലീസുദ്യോഗസ്ഥർ, മാദ്ധ്യമപ്രവർത്തകർ, ശുചീകരണ തൊഴിലാളികൾ, കായിക താരങ്ങൾ എന്നിവർക്കുള്ള സൗജന്യ മാസ്‌കുകൾ അസോസിയഷൻ സംസ്ഥാന ജനറൽ സെക്രട്ടറി രാജീവ് വിതരണം ചെയ്തു. ജില്ലയിലെ അമ്പതിലധികം കേന്ദ്രങ്ങളിൽ നടത്തിയ സൈക്കിൾ, ബൈക്ക് റാലികൾ അസോസിയേഷൻ സംസ്ഥാന വൈസ് പ്രസിഡന്റ് രഘുചന്ദ്രൻ നായർ ഫ്ളാഗ് ഓഫ് ചെയ്തു. സംസ്ഥാന ട്രഷറർ എം.ആർ. രഞ്ജിത്ത്, ജില്ലാ സ്‌പോർട്‌സ് കൗൺസിൽ പ്രസിഡന്റ് എസ്.എസ്. സുധീർ ജില്ലാ അസോസിയേഷൻ ജനറൽ സെക്രട്ടറി ആർ. അയ്യപ്പൻ തുടങ്ങിയവർ സംസാരിച്ചു.