ബാലരാമപുരം: മംഗലത്തുകോണം കാട്ടുനട ശ്രീഭദ്രകാളി ദേവീക്ഷേത്രത്തിലെ കാണിക്കവഞ്ചി കവർന്ന കേസിലെ പ്രതികൾ പിടിയിലായി. പാലോട് തടത്തരികത്ത് വളവുപച്ച ചിതറയിൽ മുഹമ്മദ് ഷാ (18)​,​ നെടുമങ്ങാട് മഞ്ച പാറയിൽക്കോണം ശിവദീപം വീട്ടിൽ അനന്തൻ ശിവകുമാർ (18)​ എന്നിവരാണ് അറസ്റ്റിലായത്. കഴിഞ്ഞ 27 ന് പുലർച്ചെയായിരുന്നു സംഭവം. പാങ്ങോട്,​ ബാലരാമപുരം പൊലീസ് എന്നിവർ സംയുക്തമായി നടത്തിയ അന്വേഷണത്തിൽ പാങ്ങോട് പൊലീസ് പാങ്ങോടിന് സമീപത്തു നിന്നാണ് പ്രതികളെ പിടികൂടിയത്. മോഷ്ടാക്കൾ സഞ്ചരിച്ചിരുന്ന കാർ പൂവാറിന് സമീപത്തു നിന്ന് ബാലരാമപുരം പൊലീസ് കണ്ടെത്തിയിരുന്നു. മറ്റ് ക്ഷേത്രങ്ങളിലും പ്രതികൾ മോഷണം നടത്തിയതായി പൊലീസിന് വിവരം ലഭിച്ചിട്ടുണ്ട്. ഇവരെ റിമാൻഡ് ചെയ്തെങ്കിലും മംഗലത്തുകോണം ക്ഷേത്രത്തിലെ മോഷണവുമായി ബന്ധപ്പെട്ട് ഇവരെ കസ്റ്റഡിയിൽ വാങ്ങുമെന്ന് സി.ഐ ജി.ബിനു അറിയിച്ചു.