പഴയങ്ങാടി: മാട്ടൂൽ പഞ്ചായത്ത് ഓഫീസിൽ അക്രമം നടത്തിയെന്ന സെക്രട്ടറി ശ്രീകുമാറിന്റെ പരാതിയിൽ എസ്.ഡി.പി.ഐ പഞ്ചായത്ത് അംഗമടക്കം പത്തുപേർക്കെതിരേ പഴയങ്ങാടി പൊലീസ് കേസെടുത്തു.

പഞ്ചായത്ത് അംഗം കെ.കെ. അനസ്, ഹാഷിം കടപ്പുറത്ത്, ഉനയിസ് മുക്കലക്കകത്ത്, മാട്ടൂൽ സെന്ററിലെ നാസർ തുടങ്ങി കണ്ടാലറിയാവുന്ന 10 പേർക്ക് എതിരെയാണ് ജാമ്യമില്ലാ വകുപ്പ് പ്രകാരം കേസ് എടുത്തത്.

കഴിഞ്ഞ ദിവസം രാവിലെ പഞ്ചായത്ത് അംഗമായ അനസ് പഞ്ചായത്ത് ഓഫീസിൽ എത്തുകയും കൊവിഡ് 19 പ്രോട്ടോകോൾ പാലിക്കാതെ സെക്രട്ടറിയെ സമീപിച്ചതുമാണ് അക്രമത്തിന് കാരണം. പ്രോട്ടോകോൾ പാലിക്കാതെ സെക്രട്ടറിയുടെ ഓഫീസിൽ കയറുന്നത് സെക്രട്ടറി തടഞ്ഞതിൽ പഞ്ചായത്ത് അംഗം ക്ഷുഭിതനായി പത്തോളം വരുന്ന എസ്.ഡി.പി.ഐ പ്രവർത്തകരെയും കൂട്ടി പഞ്ചായത്ത് ഓഫീസിന് മുന്നിൽ പ്രതിഷേധ പ്രകടനം നടത്തുകയും പഞ്ചായത്ത് ബോർഡുകളും ഫർണിച്ചറുകളും തകർക്കുകയും സെക്രട്ടറിയെയും ജീവനക്കാരെയും കയ്യേറ്റം ചെയ്തെന്നുമായിരുന്നു പരാതി.