തിരുവനന്തപുരം: സ്വർണക്കടത്ത് കേസിലെ പ്രതി സ്വപ്ന സുരേഷിന്റെ സ്‌പേസ് പാർക്കിലെ നിയമനം വിവാദമായതോടെ ഇത് നടത്തിയ പ്രൈസ് വാട്ടർഹൗസ് കൂപ്പേഴ്സിനോട് കേരളാ ഐടി ഇൻഫ്രാസ്ട്രെക്ച്ചർ വിശദീകരണം തേടി. ഇവരുടെ വിദ്യാഭ്യാസ യോഗ്യതയുമായി ബന്ധപ്പെട്ട മുഴുവൻ രേഖകളും ആവശ്യപ്പെട്ടു.

സ്‌പേസ് പാർക്കിലെ ഓപ്പറേഷൻ മാനേജർ എന്ന പദവിയിലേക്കുള്ള നിയമനം കേരളാ ഐടി ഇൻഫ്രാസ്ട്രെക്ച്ചർ നേരിട്ടല്ല നടത്തുന്നത്. പ്രൈസ് വാട്ടർഹൗസ് കൂപ്പേഴ്സിനാണ് ഇതിന്റെ ചുമതല. നിയമനം നടത്തുമ്പോൾ വ്യക്തിയുടെ വിദ്യാഭ്യാസ യോഗ്യതകൾ അടക്കം ഉറപ്പിക്കാനുള്ള ഉത്തരവാദിത്തം പ്രൈസ് വാട്ടർഹൗസ് കൂപ്പേഴ്സിനുണ്ടെന്നാണ് കെ.എസ്.എല്ലിന്റെ വിശദീകരണം. സ്വപ്നയുടെ നിയമനവുമായി ബന്ധപ്പെട്ടുള്ള മുഴുവൻ രേഖകളും കൈമാറണമെന്ന് മുഖ്യമന്ത്രിയുടെ ഓഫീസ് ആവശ്യപ്പെട്ടത് പ്രകാരം രേഖകൾ കൈമാറി.