കാട്ടാക്കട: കാട്ടാക്കട കുളത്തുമ്മൽ ഗവ.ഹയർസെക്കൻഡറി സ്കൂളിലെ പ്ലസ്ടു വിദ്യാർത്ഥിനി ആനി റേച്ചൽ സയൻസിന് 1200 മാർക്കും വാങ്ങി കാട്ടാക്കടയുടെ അഭിമാനമായി. കട്ടക്കോട്ട് കാന്തള ചൈത്രത്തിൽ ചെറുകോട് ഗവ.സ്‌കൂൾ അദ്ധ്യാപകനായ ബിജു ജോണിന്റെയും സ്റ്റാറ്റിസ്റ്റിക്ക് വിഭാഗം ഉദ്യോഗസ്ഥയായ ജലജകുമാരിയുടെയും മകളായ ആനി റേച്ചൽ

ഒന്നാം ക്ലാസ് മുതൽ പഠിത്തത്തിൽ മിടുക്കിയായിരുന്നു. പത്താം ക്ലാസിൽ ഫുൾ എ പ്ലസ് നേടി ബസ്റ്റ് ഔട്ട് ഗോയിംഗ് സ്റ്റുഡന്റ് എന്ന ബഹുമതിയും വാങ്ങിയാണ് ആനി പഠിച്ച സ്കൂളിൽ തന്നെ പ്ലസ്ടുവിന് അഡ്മിഷൻ നേടിയത്. പ്ലസ് വണ്ണിനും എല്ലാ വിഷയങ്ങൾക്കും ഫുൾ മാർക്കായിരുന്നു. ആതുര സേവന രംഗത്തെ സ്നേഹിക്കുന്ന ആനി റേച്ചലിന് എം.ബി.ബി.എസ് ആണ് ഇനി ലക്ഷ്യം.സ്കൂൾ കലോത്സവ വേദികളിലും സജീവ സാന്നിദ്ധ്യമായിരുന്നു.സംസ്ഥാന തലത്തിൽ തന്നെ ദേശഭക്തി ഗാനം, കാവ്യകേളി, മാർഗംകളി എന്നിവയിലും മത്സരിച്ചിട്ടുണ്ട് നല്ലൊരു ഗായികയുമാണ്. കുളത്തുമ്മൽ സ്‌കൂളിലെ പ്രിൻസിപ്പൽ ശ്രീകല,അദ്ധ്യാപകരായ ലേഖ, ആൽബിൻ, പി.ടി.എ പ്രസിഡന്റ് മധുസൂദനൻ നായർ എന്നിവർ വീട്ടിലെത്തി മധുരം സമ്മാനിച്ചു. നെയ്യാറ്റിൻകര വിദ്യാഭ്യാസ ജില്ലയിലെ മികച്ച സ്കൂളായ ഇവിടെ കഴിഞ്ഞ അഞ്ച് വർഷത്തിനിടയിൽ മൂന്നാം തവണയാണ് ഫുൾ മാർക്ക് നേടുന്നത്.