കോന്നി : കാട്ടുപൂച്ചയുടെ ഇറച്ചിയുമായി നാലുപേരെ വനപാലകർ അറസ്​റ്റുചെയ്തു. കോന്നി ചി​റ്റൂർമുക്ക് പത്തിയത്ത് വീട്ടിൽ ബിജു, തയ്യിൽ കുഞ്ഞുമോൻ, പാറപ്പള്ളിൽ വിനീഷ് വിജയൻ ,റാന്നി ഉതിമൂട് സ്വദേശി ജോസ് എന്നിവരെയാണ് കോന്നി റേഞ്ച് ഫോറസ്​റ്റ് ഓഫീസർ സലിൻ ജോസ്, കുമ്മണ്ണൂർ ഫോറസ്​റ്റ് സ്​റ്റേഷൻ ഡെപ്യൂട്ടി റേഞ്ച് ഓഫീസർ എസ്.സനോജ്, ഫോറസ്​റ്റ് സെക്ഷൻ ഓഫീസർമാരായ ജിജോ വർഗീസ്, ഡി.വിനോദ് , ബീ​റ്റ് ഫോറസ്​റ്റ് ഓഫീസർമാരായ പി.പ്രവീൺ, വി.വിനോദ് ,എസ്.ശരത്, പി.കെ. ബൈജു, ബി.സജിനി, രാഖി എസ് രാജൻ, വി.താര എന്നിവരടങ്ങുന്ന സംഘം അറസ്​റ്റുചെയ്തത്.
ഉതിമൂട് പുത്തൻപറമ്പിൽ ബാബുവിന്റെ പുരയിടത്തിൽ കെണി ഒരുക്കി കാട്ടുപൂച്ചയെ പിടികൂടി കൊലപ്പെടുത്തി കോന്നിയിലേക്ക് കൊണ്ടുവരികയായിരുന്നു. ഇന്നലെ രാവിലെ എട്ടോടെ റേഞ്ച് ഓഫീസർക്ക് ലഭിച്ച രഹസ്യവിവരത്തെ തുടർന്ന് ചി​റ്റൂർമുക്കിലെ ബിജുവിന്റെ വീട്ടിൽ പരിശോധന നടത്തി ഫ്രിഡ്ജിൽ സൂക്ഷിച്ചിരുന്ന രണ്ടര കിലയോളം വരുന്ന ഇറച്ചി കണ്ടെടുക്കുകയായിരുന്നു. തുടർന്ന് മറ്റുള്ളവരെയും പിടികൂടി.തിങ്കളാഴ്ച വൈകിട്ട് ഉതിമൂട്ടിൽ നിന്ന് കൊണ്ടുവന്ന കാട്ടുപൂച്ചയെ ഇവർ ചി​റ്റൂർ കടവിലെ പുൽ കാട്ടിൽ വച്ച് അറുത്ത് ഇറച്ചിയാക്കി പാകം ചെയ്തു കഴിക്കുകയും ബാക്കി ബിജുവിന്റെ ഫ്രിഡ്ജിൽ സൂക്ഷിക്കുകയുമായിരുന്നു. ബാബുവിന്റെ വീടിന്റെ ടെറസിൽ നിന്ന് കെണി കണ്ടെടുത്തു.കേസിൽ മൂന്ന് പ്രതികൾ കൂടിയുള്ളതായി വനപാലകർ പറഞ്ഞു. പിടിയിലായവരെ ഇന്ന് കോടതിയിൽ ഹാജരാക്കും.