തിരുവനന്തപുരം: പ്രകൃതി രമണീയമായ വെള്ളാണിക്കൽ പാറമുകളിനെ ജില്ലയുടെ ടൂറിസം ഭൂപടത്തിലെ പ്രധാന കേന്ദ്രമാക്കുമെന്ന പ്രഖ്യാപനം എങ്ങുമെത്തിയില്ല. വിനോദ സഞ്ചാര മേഖലയിൽ സാഹസിക ടൂറിസത്തിന് മികച്ച അടിസ്ഥാന സൗകര്യങ്ങളുള്ള വെള്ളാണിക്കൽ പാറമുകൾ ഇപ്പോൾ പകൽ സമയത്തുപോലും സാമൂഹ്യവിരുദ്ധരുടെയും മദ്യപന്മാരുടെയും വിഹാരകേന്ദ്രമായി മാറി. കൊവിഡ് കാലമായതിനാൽ പൊലീസുകാരുടെ ശല്യമുണ്ടാവില്ലെന്ന തിരിച്ചറിവിലാണിത്. പാറമുകളിന്റെ ഭൂമിശാസ്ത്രമായ പ്രത്യേകത കാരണം ചെലവ് കുറഞ്ഞ സാഹസിക വിനോദ സഞ്ചാര സൗകര്യങ്ങൾ ഇവിടെ ഒരുക്കാനാകും. കണ്ണൂർ, കോഴിക്കോട്, കൊച്ചി, ആലപ്പുഴ, കോവളം, വാഗമൺ തുടങ്ങിയ സ്ഥലങ്ങളിൽ സാഹസിക ടൂറിസത്തിന് ഇപ്പോൾ തന്നെ പദ്ധതികൾ ആവിഷ്കരിച്ചിട്ടുണ്ട്. വെള്ളാണിക്കൽ പാറമുകളിനെയും ഈ പദ്ധതിയിൽ ഉൾപ്പെടുത്തിയാൽ തലസ്ഥാന ജില്ലയ്ക്ക് ഏറെ മുതൽക്കൂട്ടാകും. ഇവിടെ നിരവധി പദ്ധതികൾ പ്രഖ്യാപിച്ചിരുന്നെങ്കിലും മുകളിലേക്ക് കയറാനുള്ള പടികളും താഴെ ഒരു ഓഫീസ് മുറിയും കെട്ടിയത് മാത്രമാണ് നടന്നത്. സന്ദർശകർക്ക് അത്യാവശ്യം വേണ്ട പ്രാഥമിക സൗകര്യങ്ങൾ പോലും ഇവിടെ ഒരുക്കിയിട്ടില്ല.
ടൂറിസം സാദ്ധ്യതകൾ
------------------------------------
ഒരിക്കലും വറ്റാത്ത നീരുറവകളും നിരവധി കൊത്തുപണികളും ശിലാ ലിഖിതങ്ങളും കൊത്തിയുണ്ടാക്കിയ ഗുഹാ മുഖവും പുലിച്ചാണിയും ചരിത്രശേഷിപ്പുകളായി ഇന്നും നിലനിൽക്കുന്നു. നൂറ്റാണ്ടുകൾ പിന്തുടരുന്ന ഗോത്രാചാരപ്രകാരമുള്ള ആരാധനാ സമ്പ്രദായങ്ങൾ പിന്തുടരുന്ന ആയിരവില്ലി ക്ഷേത്രവും അതോടനുബന്ധിച്ചുള്ള ആചാരാനുഷ്ഠാനങ്ങളും തീർത്ഥാടന ടൂറിസം സർക്യൂട്ട് പദ്ധതിക്ക് അനുയോജ്യമാണ്. പാരാഗ്ലൈഡിംഗ്, മൗണ്ടൻ സൈക്ളിംഗ്, റോപ്പ് ക്ലൈമ്പിംഗ്, കുതിര സവാരി, അഡ്വെഞ്ചർ പാർക്കുകൾ തുടങ്ങി സാഹസിക ടൂറിസ്റ്റുകളെ ആകർഷിക്കുന്ന സൗകര്യങ്ങൾ ഒരുക്കിയാൽ അത് ആഭ്യന്തര ടൂറിസത്തിനും മുതൽക്കൂട്ടാകും. ആരോഗ്യ ടൂറിസം, സാംസ്കാരിക ടൂറിസം, എത്നിക് ടൂറിസം തുടങ്ങിയ പദ്ധതികൾ ഉൾപ്പെടുത്തി സമഗ്രമായ ഒരു ടൂറിസം പദ്ധതി നടപ്പിലാക്കിയാൽ വെള്ളാണിക്കൽ പാറമുകളിന്റെ മുഖച്ഛായ മാറ്റാം.
ഇവിടെ എത്തിച്ചേരാൻ
---------------------------------------------------
പോത്തൻകോടു നിന്നു കോലിയക്കോട് വഴി 2 കിലോമീറ്ററും, വെഞ്ഞാറമൂട് നിന്നു പാറക്കൽ വഴി 5 കിലോമീറ്ററും വേങ്ങോട് നിന്നു 3 കിലോമീറ്ററും, ആറ്റിങ്ങൽ മുദാക്കൽ വഴി 5 കിലോമീറ്ററും യാത്രചെയ്‌താൽ വെള്ളാണിക്കൽ പാറമുകളിലെത്താം.
പാറമുകളിൽ പ്രഖ്യാപിച്ചത്
-----------------------------------------------------
കുട്ടികൾക്കുള്ള ആധുനിക പാർക്ക്, പാറയിൽ കൊത്തിയുണ്ടാക്കുന്ന നടപ്പാതകൾ. അസ്തമയം കാണാൻ പാറയിൽ കൊത്തിയുണ്ടാക്കിയ ഇരിപ്പിടങ്ങൾ, പാറമുകളിലെ വാഹന പാർക്കിംഗ് എരിയകൾ, റോപ്‌വേ, ഔഷധ ഉദ്യാനങ്ങൾ, ഫാമിലി റിസോർട്ടുകൾ, കൃത്രിമ വെള്ളച്ചാട്ടം, റോക്ക് ഗാർഡൻ
നിലവിലെ അവസ്ഥ
------------------------------------
സഞ്ചാരികളുടെ ഇഷ്ടകേന്ദ്രമായ വെള്ളാണിക്കൽ പാറമുകളിന്റെ അവസ്ഥ ദയനീയമാണ്. കോലിയക്കോട് നിന്ന് വെള്ളാണിക്കലേക്കുള്ള പ്രധാന റോഡിൽ കാൽനട യാത്ര പോലും ബുദ്ധിമുട്ടാണ്. രാത്രിയായാൽ ഇവിടെ വെളിച്ചമില്ല. റോഡിലെ ആളൊഴിഞ്ഞ വളവുകൾ മദ്യപന്മാരുടെ കേന്ദ്രമാണ്. പൊലീസിന്റെ ശ്രദ്ധ പതിയാത്തതിനാൽ സാമൂഹ്യവിരുദ്ധശല്യവും വർദ്ധിക്കുകയാണ്.
പാറമുകളിന്റെ വിസ്‌തൃതി - 23 എക്കർ
സമുദ്രനിരപ്പിൽ നിന്നുള്ള ഉയരം - 650 അടി