കല്ലമ്പലം : ഭ‌ർത്താവിന്റെ വെട്ടേറ്റ് ഭാര്യയ്ക്ക് പരിക്കേറ്റു. ഭർത്താവിനെ നാട്ടുകാർ പിടിച്ചുകെട്ടി പൊലീസിലേൽപ്പിച്ചു. പാങ്ങോട് ഭരതന്നൂർ പാകിസ്ഥാൻമുക്ക് പി.വി ഹൗസിൽ യൂസഫ്‌ കുഞ്ഞ് (48) ആണ് റിമാൻഡിലായത്. ഇയാൾ ഭാര്യ നസീമയും മക്കളുമായി പുതുശ്ശേരിമുക്ക് അജ്മൽ കോട്ടേജിൽ വാടകയ്ക്കാണ് താമസം. കഴിഞ്ഞ ദിവസം രാത്രി 9 മണിയോടെ മദ്യപിച്ച് വീട്ടിലെത്തിയെ യൂസഫ്‌കുഞ്ഞ് ഭാര്യയോട് വഴക്കിടുകയും കറിക്കത്തിയെടുത്ത് കഴുത്തിനുനേരെ വീശുകയുമായിരുന്നു. തടഞ്ഞ നസീമയുടെ വിരലുകൾ അറ്റു. തുടർന്നുള്ള ആക്രമണത്തിൽ ദേഹമാസകലം മുറിവേറ്റു. ഇവരുടെ നിലവിളികേട്ട് ഓടിക്കൂടിയ നാട്ടുകാർ യൂസഫ്‌ കുഞ്ഞിനെ പിടിച്ചുകെട്ടി കല്ലമ്പലം പൊലീസിലേൽപ്പിച്ചു. നസീമയെ നെടുമങ്ങാട് താലൂക്കാശുപത്രിയിൽ പ്രവേശിപ്പിച്ചു. കല്ലമ്പലം സി.ഐ. ഫാറോസിന്റെ നേതൃത്വത്തിൽ എസ്.ഐ ഗംഗാ പ്രസാദും മൂന്നോളം പൊലീസുകാരുമടങ്ങുന്ന സംഘമാണ് പ്രതിയെ കസ്റ്റഡിയിലെടുത്തത്. കോടതിയിൽ ഹാജരാക്കിയ പ്രതിയെ റിമാൻഡ്‌ ചെയ്തു.