തിരുവനന്തപുരം: കേരള സർവകലാശാലയോട് അഫിലിയേറ്റ് ചെയ്തിട്ടുള്ള സർക്കാർ, എയ്ഡഡ്, സ്വാശ്രയ ആർട്സ് ആൻഡ് സയൻസ് കോളേജുകളിലും, യു.ഐ.ടി, ഐ.എച്ച്.ആർ.ഡി കേന്ദ്രങ്ങളിലും ഒന്നാം വർഷ ബിരുദ കോഴ്സിലേക്കുള്ള പ്രവേശനത്തിന് ഓൺലൈൻ രജിസ്‌ട്രേഷൻ https://admissions.keralauniversity.ac.in എന്ന വെബ്സൈറ്റിൽ നടത്താം. ഓൺലൈൻ അപേക്ഷ സ്വീകരിക്കുന്ന അവസാന തീയതി ആഗസ്റ്റ് 17. എല്ലാ കോളേജുകളിലെയും മെരിറ്റ് സീറ്റുകളിലേക്കും എസ്.സി/എസ്.ടി/ എസ്.ഇ.ബി.സി സംവരണ സീറ്റുകളിലേക്കും ഏകജാലക സംവിധാനം വഴിയായിരിക്കും അലോട്ട്‌മെന്റ്. എല്ലാ വിദ്യാർത്ഥികളും (മാനേജ്‌മെന്റ് ക്വാട്ട, കമ്യൂണിറ്റി ക്വാട്ട, സ്‌പോർട്സ് ക്വാട്ട, ഭിന്നശേഷിയുള്ളവർ, തമിഴ് ഭാഷ ന്യൂനപക്ഷ വിഭാഗങ്ങൾ, ലക്ഷദ്വീപ് നിവാസികൾ ഉൾപ്പെടെ) ഏകജാലക സംവിധാനം വഴി അപേക്ഷിക്കണം. രജിസ്‌ട്രേഷൻ സമയത്ത് നൽകുന്ന മൊബൈൽ നമ്പരുകൾ പ്രവേശന നടപടികൾ അവസാനിക്കുന്നതുവരെ മാറ്റരുത്. കമ്യൂണിറ്റി ക്വാട്ട, സ്‌പോർട്സ് ക്വാട്ട പ്രവേശനത്തിനായുള്ള രജിസ്‌ട്രേഷനും ഓൺലൈനായി നടത്തും.