നവീകരണം കാത്ത് കിളിമാനൂർ ഭാഗത്തെ പാലങ്ങൾ

കിളിമാനൂർ: ആധുനിക നിലാവരത്തിൽ റോഡുകൾ നവീകരിക്കുമ്പോഴും ഈ ഭാഗങ്ങളിലെ പാലങ്ങളെ ആരും തിരിഞ്ഞു നോക്കാറില്ലെന്ന് പരാതി. റോഡുകൾ വീതി കൂട്ടി നവീകരിച്ചതോടെ കുപ്പിക്കഴുത്ത് പോലെയായ അഞ്ച് പാലങ്ങളുടെ നവീകരണം വാഗ്ദാനങ്ങളിൽ ഒതുങ്ങി. സംസ്ഥാന പാതയെ കൊല്ലം ജില്ലയിലെ കടയ്ക്കലുമായി ബന്ധിപ്പിക്കുന്ന പാലവും ഇതിൽ ഉൾപ്പെടും. ഇവയുടെ വികസനത്തിനായി ഫണ്ട് അനുവദിച്ചതായി സ്ഥലം എം.എൽ.എ വർഷങ്ങൾക്ക് മുമ്പ് അറിയിച്ചിരുന്നെങ്കിലും നടപടികൾ എങ്ങുമെത്തിയില്ലെന്നാണ് നാട്ടുകാരുടെ ആക്ഷേപം. കാരേറ്റ് ജംഗ്ഷനിൽ നിന്നു നഗരൂർ ജംഗ്ഷനിൽ എത്തുന്ന പ്രധാന പാതയിൽ രണ്ട് പാലങ്ങളാണ് അപകടാവസ്ഥയിലുള്ളത്. അരനൂറ്റാണ്ടിന് മുമ്പു നിർമ്മിച്ച ചെറുക്കാരം പാലത്തിന് അഞ്ചു മീറ്റർ വീതി മാത്രമാണുള്ളത്. കാലപ്പഴക്കം കൊണ്ട് പാലത്തിന്റെ അടിത്തട്ടും ബീമുകളും ഒക്കെ തകർന്ന അവസ്ഥയിലാണ്. ഇരുവശത്തെയും റോഡുകൾ എട്ട് മീറ്ററോളം വീതിയിൽ നവീകരിച്ചങ്കിലും അപകടാവസ്ഥയിലായ ചെറുകാരം പാലത്തിന്റെ നവീകരണം അനന്തമായി നീളുകയാണ്. നഗരൂർ ജംഗ്ഷന് സമീപത്തായുള്ള പാലവും അപകട ഭീഷണി ഉയർത്തുകയാണ്. ചെമ്മരത്ത് മുക്ക് കല്ലമ്പലം റോഡിൽ വെള്ളല്ലൂർ പാലത്തിന്റെ സ്ഥിതിയും വ്യത്യസ്തമല്ല. അനുവദനീയമായതിന്റെ പത്തിരട്ടിയോളം ഭാരവുമായി കടന്നു പോകുന്ന ടോറസുകൾ പാലത്തിന് മാത്രമല്ല റോഡിനും അപകട ഭീഷണിയാണ്. അരനൂറ്റാണ്ടിലേറെ പഴക്കമുള്ള അടയമൺ റോഡിലെ വയ്യാറ്റിൻകര പാലം വീതി കൂട്ടി പലവട്ടം റോഡ് നവീകരിച്ചിട്ടും അപകടാവസ്ഥയിലായ പാലത്തിന് നവീകരണം ഇനിയും നടന്നിട്ടില്ല. കിളിമാനൂർ ടൗണിലുള്ള കൊച്ചു പാലം ഏത് നിമിഷവും തകർന്നു വീഴാവുന്ന അവസ്ഥയിലാണ്. നിത്യേന ട്രക്കുകളും സർവീസ് ബസുകളും ഉൾപ്പെടെ നൂറു കണക്കിന് വാഹനങ്ങളാണ് ഇതുവഴി കടന്നു പോകുന്നത്. കാര്യങ്ങളുടെ ഗൗരവം കണക്കിലെടുത്ത് അധികൃതർ വേണ്ട നടപടികൾ കൈക്കൊള്ളണമെന്ന ആവശ്യവും ഉയരുകയാണ്.

പാലങ്ങൾക്ക് ഭീഷണി

 കാലപ്പഴക്കം

 വീതി കുറവ്

സംരക്ഷണ ഭിത്തികൾ തകർന്നു

അമിതഭാരവുമായി പോകുന്ന വാഹനങ്ങൾ

കൊച്ചു പാലത്തിന്റെ ടെൻഡർ നടപടികൾ പൂർത്തിയായി, ചെറുക്കാരം പാലത്തിന്റെ ടെൻഡർ നടപടികൾ പുരോഗമിക്കുന്നു. നഗരൂർ പാലത്തിന് ഭരണാനുമതി ലഭിച്ചു. മറ്റു പാലങ്ങളുടെ നിർമാണം പരിഗണനയിലാണ്. - ബി. സത്യൻ എം.എൽ.എ

നവീകരിക്കേണ്ടവ

കുറവൻകുഴി - കടയ്ക്കൽ റോഡിലെ വയ്യാറ്റിൻകര പാലം

കാരേറ്റ് - നഗരൂർ റോഡിൽ ചെറു കാരം പാലം

നഗരൂർ ജംഗ്ഷനു സമീപമുള്ള നഗരൂർ പാലം

ചെമ്മരത്ത് മുക്ക് - കല്ലമ്പലം റോഡിലെ വെള്ളല്ലൂർ പാലം

 കിളിമാനൂർ ടൗണിലെ കൊച്ചു പാലം