തിരുവനന്തപുരം: സ്വർണക്കടത്ത് കേസുമായി ബന്ധപ്പെട്ട് മന്ത്രി കെ.ടി. ജലീലിന്റെ കീഴിലുള്ള സ്ഥാപനമായ വട്ടിയൂർക്കാവിലെ സി-ആപ്​റ്റിൽ കസ്​റ്റംസ് പരിശോധന നടത്തി.

യു.എ.ഇ കോൺസുലേ​റ്റിൽ നിന്ന് സീൽഡ് കവറുകളടക്കം ചില പാഴ്സലുകൾ സി-ആപ്റ്റിലും, ഇവിടെ നിന്ന് സി- ആപ്​റ്റിന്റെ വാഹനത്തിൽ മലപ്പുറത്തും എത്തിച്ചതായി വിവരം കിട്ടിയിരുന്നു..ഇതിന്റെ നിജസ്ഥിതി അറിയാനാണ് കസ്​റ്റംസ് പരിശോധന. ഉച്ചയോടെ സി.ആപ്​റ്റിന്റെ വട്ടിയൂർക്കാവിലെ ഓഫീസിലെത്തിയ കസ്​റ്റംസ് സംഘം സി ആപ്‌റ്റിലെ ഉദ്യോഗസ്ഥരിൽ നിന്ന് വിവരങ്ങൾ ശേഖരിച്ചു.

റംസാൻ റിലീഫിന്റെ ഭാഗമായി യു.എ.ഇ കോൺസുലേ​റ്റ് മലപ്പുറത്ത് നൽകിയ ഭക്ഷ്യകി​റ്റിനൊപ്പം മതഗ്രന്ഥങ്ങളും വിതരണം ചെയ്തിരുന്നു. ഇത് സി-ആപ്‌റ്റിൽ അച്ചടിച്ചതായാണ് കസ്റ്റംസിന് കിട്ടിയ വിവരം. ഭക്ഷ്യ കി​റ്റിനായി സ്വർണക്കടത്തു കേസിലെ പ്രതി സ്വപ്ന സുരേഷിനെ മന്ത്രി കെ.ടി. ജലീൽ പലപ്പോഴായി വിളിച്ചിരുന്നതായി കസ്റ്റംസ് കണ്ടെത്തിയിരുന്നു. ഭക്ഷ്യകിറ്റിന്റെ ആവശ്യത്തിനായി യു.എ.ഇ കോൺസുൽ ജനറലിന്റെ നിർദ്ദേശ പ്രകാരമാണ് സ്വപ്നയെ വിളിച്ചതെന്നാണ് ജലീലിന്റെ വിശദീകരണം. സി- ആപ്​റ്റിലെ സി.സി.ടി. വി ദൃശ്യങ്ങളും സുപ്രധാനമായ ചില രേഖകളും കസ്റ്റംസ് ശേഖരിച്ചു. സംസ്ഥാന സർക്കാരിനു കീഴിലുള്ള ഹൈ സെക്യൂരി​റ്റി പ്രിന്റിംഗ് പ്രസാണ് ഇവിടെയുള്ളത്.