 ടെണ്ടർ 14 ന് തുറക്കും

ആലപ്പുഴ:പ്രളയത്തെ അതിജീവിക്കുന്ന ആലപ്പുഴ- ചങ്ങനാശ്ശേരി റോഡ് എന്ന ആശയം യാഥാർത്ഥ്യത്തിലേക്കടുക്കുന്നു. ഇതിന്റെ കരാർ നൽകാനുള്ള ടെണ്ടർ 14 ന് വൈകിട്ട് 4 ന് തിരുവനന്തപുരത്തെ കെ.എസ്.ടി.പി ഓഫീസിൽ തുറക്കും. ഇ.പി.സി (എൻജിനിയറിംഗ് പ്രൊക്വയർമെന്റ് കോൺട്രാക്ട്) മാതൃകയിലാണ് നിർമ്മാണം. കരാർ ഉറപ്പിച്ചാൽ വൈകാതെ പണി തുടങ്ങും. കെ.എസ്.ടി.പിക്കാണ് നിർമ്മാണ മേൽനോട്ടം.

2018 -ലെ പ്രളയത്തിൽ എ.സി റോഡ് പൂർണമായി മുങ്ങിയതോടെ മാസങ്ങളോളമാണ് ഗതാഗതം മുടങ്ങിയത്. എല്ലാ പ്രളയകാലത്തും ഇത് പതിവുമാണ്. 10 കോടി ചിലവിൽ ചിലഭാഗങ്ങൾ താത്കാലികമായി ഉയർത്തിയെങ്കിലും ഇപ്പോഴത്തെ കാലവർഷത്തിലും ഗതാഗതം നിറുത്തേണ്ടി വന്നു. കോട്ടയം-ആലപ്പുഴ ജില്ലകളെ യോജിപ്പിക്കുന്ന, ഏറെ ഗതാഗത പ്രാധാന്യമുള്ള പാത ഏത് വെള്ളപ്പൊക്കത്തെയും അതിജീവിക്കും വിധം പുനർനിർമ്മിക്കാൻ റീബിൽഡ് കേരള പദ്ധതിയിൽ ഉൾപ്പെടുത്തിയാണ് പുനർനിർമ്മിക്കുന്നത്.

 പദ്ധതി തുക: 624.48 കോടി

ദൈർഘ്യം: 24.14 കിലോ മീറ്റർ

 നിർമാണ കാലാവധി :3 വർഷം

വ്യത്യസ്ത വിദ്യകൾ

പ്രളയകാലത്ത് ഉണ്ടായിട്ടുള്ള ഏറ്റവും ഉയർന്ന ജലനിരപ്പ് അടിസ്ഥാനമാക്കി റോഡ് ഉയർത്താൻ 20 കിലോമീറ്ററിൽ മൂന്ന് തരത്തിലാണ് നിർമ്മാണം. ആദ്യത്തെ 2.9 കി.മീറ്റർ ബി.എം ആൻഡ് ബി.സി മാത്രം. 8.27കി.മീറ്റർ കയർ ഭൂവസ്ത്ര പാളി ഉപയോഗിച്ച് മെച്ചപ്പെടുത്തും. 9 കി.മീറ്റർ ഭാഗത്ത് ജിയോ ഗ്രിഡും കയർ ഭൂവസ്ത്രവും ഉപയോഗിക്കും

രണ്ട് തരം ഫ്ളൈ ഓവറുകൾ

റോഡ് ഉയർത്തിയാലും വെള്ളപ്പൊക്ക ഭീഷണി ഉണ്ടായേക്കാവുന്ന അഞ്ച് കേന്ദ്രങ്ങളിൽ എലിവേറ്റഡ് മാതൃകയിലാവും നിർമ്മാണം.അഞ്ച് ഫ്ളൈഓവറുകൾക്കും കൂടി 1.79 കിലോ മീറ്റർ ദൈർഘ്യമുണ്ടാവും.രണ്ട് മാതൃകയിലാവും ഫ്ളൈഓവറുകൾ നിർമിക്കുക.

ടൈപ്പ് ഒന്ന്

ഒന്നാംകര മുതൽ മങ്കൊമ്പ് ജംഗ്ഷൻ വരെ(370 മീറ്റർ)

മങ്കൊമ്പ് തെക്കേക്കര (240 മീറ്റർ)

പൊങ്ങ കലുങ്ക് മുതൽ പണ്ടാരക്കുളം വരെ (485 മീറ്റർ)

ടൈപ്പ് രണ്ട്

മങ്കൊമ്പ് ജംഗ്ഷൻ മുതൽ മങ്കൊമ്പ് കലുങ്ക് വരെ (440മീറ്റർ)

ജ്യോതി ജംഗ്ഷൻ മുതൽ പറശ്ശേരിൽ പാലം വരെ (260 മീറ്റർ)