ഹരിപ്പാട്: എസ്.എൻ.ഡി.പി.യോഗം ചേപ്പാട് യൂണിയൻ പത്തിയൂർ മേഖലയിലെ കരീലക്കുളങ്ങര 1121ാം നമ്പർ ശാഖയുടെ ആഭിമുഖ്യത്തിൽ എസ്.എസ്.എൽ.സി, പ്ളസ്ടു പരീക്ഷകളിൽ ഉന്നത വിജയം നേടിയ വിദ്യാർത്ഥികളെ അനുമോദിച്ചു. പത്തിയൂരിലെ കോവിഡ് പ്രതിരോധ പ്രവർത്തനങ്ങൾക്ക് നേതൃത്വം നൽകുന്ന ആരോഗ്യ പ്രവർത്തകരെയും ആദരിച്ചു. കരീലക്കുളങ്ങരയിലെ ഓട്ടോറിക്ഷ ഡ്രൈവർമാർക്കുള്ള മാസ്ക്ക്, ഫെയ്‌സ് ഷീൽഡ്, സാനിറ്റൈസർ തുടങ്ങിയവ വിതരണം ചെയ്തു. കൊവിഡ് മാനദണ്ഡങ്ങൾ പാലിച്ച് നടന്ന ചടങ്ങ് ചേപ്പാട് യൂണിയൻ പ്രസിഡന്റ് എസ്.സലികുമാർ ഉദ്ഘാടനം ചെയ്തു. ശാഖ പ്രസിഡന്റ് ഡി.ബിജു അദ്ധ്യക്ഷനായി. ചേപ്പാട് യൂണിയൻ സെക്രട്ടറി എൻ.അശോകൻ അവാർഡ് വിതരണം നിർവ്വഹിച്ചു. യൂണിയൻ കൗൺസിലറും മേഖലാ ചെയർമാനുമായ ബിജു പത്തിയൂർ കോവിഡ് പ്രതിരോധ ഉപകരണങ്ങളുടെ വിതരണം നിർവ്വഹിച്ചു. മേഖല കൺവീനർ അഡ്വ.അമൽരാജ്, ശാഖ സെക്രട്ടറി സുജിത് കുമാർ, വൈസ് പ്രസിഡന്റ് വിനോദ്, സുനിൽ തുടങ്ങിയവർ സംസാരിച്ചു.