ആലപ്പുഴ:ജില്ലാതല സ്വാതന്ത്ര്യദിനാഘോഷം നാളെ പൊലീസ് പരേഡ് ഗ്രൗണ്ടിൽ നടക്കും. രാവിലെ 9ന് മന്ത്രി ഡോ.ടി.എം.തോമസ് ഐസക് ദേശീയപതാക ഉയർത്തും. തുടർന്ന് സ്വാതന്ത്ര്യ ദിന സന്ദേശം നൽകും.
കൊവിഡ് കാരണം പരമാവധി ആളെ കുറച്ച് പ്രത്യേക മാർഗ്ഗ നിർദ്ദേശങ്ങളോടെ സംഘടിപ്പിക്കാൻ സർക്കാർ നിർദ്ദേശിച്ചിട്ടുണ്ട്. ഔപചാരിക പരേഡ് മാത്രമാണ് ഇത്തവണ ഉണ്ടാവുക. പൊതുജനങ്ങൾക്ക് പ്രവേശനം അനുവദിക്കില്ല. കുട്ടികൾക്കും മുതിർന്ന പൗരന്മാർക്കും ചടങ്ങിൽ അനുവാദമില്ല.ക്ഷണിക്കപ്പെട്ടവരുടെ പരമാവധി എണ്ണം 100 ആയിരിക്കും. ഇത്തവണ റിസർവ് പൊലീസ്, ലോക്കൽ പൊലീസ്, എക്‌സൈസ് വിഭാഗങ്ങൾ മാത്രമാണ് ഔപചാരിക പരേഡിൽ പങ്കെടുക്കുക. മാർച്ച് പാസ്റ്റ് ഒഴിവാക്കിയിട്ടുണ്ട്. മൂന്ന് ഡോക്ടർമാർ, രണ്ട് വീതം നഴ്സുമാർ, പാരാമെഡിക്കൽ ജീവനക്കാർ, ശുചിത്വ തൊഴിലാളികൾ, കൊവിഡ് രോഗശമനം നേടിയ മൂന്ന് വ്യക്തികൾ എന്നിവരെ ചടങ്ങുകൾക്ക് സാക്ഷ്യം വഹിക്കാൻ ക്ഷണിക്കും. ഭക്ഷണ പാനീയ വിതരണം പാടില്ല.