ആലപ്പുഴ: കണ്ടാൽ ഭീകര ലുക്കാണ്. എന്നാൽ ഇവരുടെ പ്രവർത്തനങ്ങൾ കാരുണ്യം നി​റഞ്ഞവയാണ്. കൊല്ലം ജില്ലയിലെ താടിക്കാരുടെ കൂട്ടായ്മയായ കേരളാ ബിയേർഡ് സൊസൈറ്റിയി​ലെ അംഗങ്ങളാണ് കഥാപാത്രങ്ങൾ.

പത്ത് ദിവസം കൊണ്ട് കോയിൻ ചലഞ്ചിലൂടെ 35,000 ത്തിലധികം രൂപ സമാഹരി​ച്ച ഇവർ നിർദ്ധനരായ അഞ്ച് വിദ്യാർത്ഥികൾക്ക് ടി​ വി​ നൽകി​. കോവിഡ് കാലത്തെ ഓൺലൈൻ പഠന സഹായത്തിനായാണ് ടിവി നൽകിയത്.

കെ.ബി.എസ് സംസ്ഥാനതല എക്സിക്യൂട്ടിവ് മെമ്പർമാരായ ഹാരിസ് , സുമൻ, കൊല്ലം ജില്ലാ പ്രസിഡന്റ് അശ്വന്ത് , സെക്രട്ടറി സുനിൽ, മെമ്പർമാരായ വിനായകൻ, മനീഷ്, അൻഷാദ്, റാഫി, ഷംനാദ്, അനന്ദു, രാഹുൽ എന്നിവരുടെ നേതൃത്വത്തിൽ ഒരുകൂട്ടം യുവാക്കളുടെയും അവരുടെ സുഹൃത്തുക്കളുടെയും ശ്രമഫലമായാണ് കോയിൻ ചലഞ്ചിലൂടെ തുക കണ്ടെത്തിയത്.

ഇവർക്ക് സഹായമായി ഇരവിപുരം സി. ഐ വിനോദ് കുമാർ, കിളികൊല്ലൂർ സി. ഐ അനിൽ കുമാറും ഉണ്ടായിരുന്നു. മുൻപും സമൂഹത്തിന് മാതൃകയാകുന്ന നിരവധി ചാരിറ്റി പ്രവർത്തനങ്ങൾ ഇവർ നടത്തി​യി​ട്ടുണ്ട്. കഴിഞ്ഞ വർഷം അച്ചൻകോവിൽ ഗവ. സ്കൂളിലെ 1 മുതൽ 4 വരെ ഉള്ള മുഴുവൻ വിദ്യാർത്ഥികൾക്കും സമ്പൂർണ പഠന കിറ്റുകൾ നൽകിയി​രുന്നു.

കുടുക്ക നൽകി​, പണം കണ്ടെത്തി​

മുൻ വർഷങ്ങളിൽ ഇത്തരം പ്രവർത്തനകൾക്ക് വേണ്ട തുക മെമ്പർമാർ തന്നെ സ്വന്തം വരുമാനത്തിൽ കണ്ടെത്തുകയായിരുന്നു . എന്നാൽ കോവിഡ് പശ്ചാത്തലത്തിൽ പലർക്കും വരുമാനം നിലച്ചപ്പോൾ കെ. ബി. എസ് മെമ്പർമാർ തങ്ങളുടെ സുഹൃത്തുക്കളെ കൂടി ഉൾപ്പെടുത്തി. ഓഗസ്റ്റ് ഒന്നിന് എല്ലാവർക്കും ഓരോ വഞ്ചികൾ കൊടുത്തു. അതിൽ നിക്ഷേപിച്ച പൈസ എല്ലാം സ്വരുക്കൂട്ടി ആ തുകയ്ക്ക് വാങ്ങിയ ടി വികൾ സ്വാതന്ത്ര്യ ദിനത്തിൽ അഞ്ച് വിദ്യാർത്ഥികൾക്ക് വിതരണം ചെയ്തു.