മാന്നാർ : കോൺക്രീറ്റ് സ്‌ളാബ് വീണ് കുട്ടിക്ക് പരിക്കേറ്റു. മാമ്മൂട്ടിൽ പടിഞ്ഞാറേതിൽ വിഷ്ണു - ശാലിനി ദമ്പതികളുടെ മകൻ ഗൗതമിനാണ് (5) പരിക്കേറ്റത്. പാണ്ടനാട് പഞ്ചായത്തിലെ ഏഴാം വാർഡിലെ മാമ്മൂട്ടിൽ കടവ് റോഡിൽ ഇന്നലെ ഉച്ചയ്ക്ക് 12.15 ഓടെയായിരുന്നു സംഭവം. ഒരു മാസം മുൻപ് കോൺക്രീറ്റ് ചെയ്ത റോഡിന് സമീപം അശാസ്ത്രീയമായ രീതിയിൽ സ്ഥാപിച്ച ശിലാഫലകം ഉൾകൊള്ളുന്ന സ്ലാബാണ് ദേഹത്തു വീണത്.

കുട്ടിക്ക് ചെങ്ങന്നൂർ ഗവ.ആശുപത്രിയിൽ ചി​കിത്സ നൽകി. വീഴ്ചയുടെ ആഘാതത്തിൽ കുട്ടിയുടെ കാലിന് പൊട്ടൽ സംഭവിച്ചിട്ടുണ്ട്. സംഭവവുമായി ബന്ധപ്പെട്ട് പഞ്ചായത്ത് അധികാരികൾക്ക് പരാതി നൽകിയെങ്കിലും സ്വീകരിക്കാൻ അധികാരികൾ തയ്യാറായില്ലെന്ന് മാതാപിതാക്കളും ബന്ധുക്കളും ആരോപിച്ചു.