ചേർത്തല:തണ്ണീർമുക്കം ഗ്രാമപഞ്ചായത്തിന്റെ ആഭിമുഖ്യത്തിൽ നൂറ് കിടക്കകളോടു കൂടിയ കൊവിഡ് ഫസ്​റ്റ് ലൈൻ ട്രീ​റ്റ്‌മെന്റ് സെന്റർ കരിക്കാട് സെന്റ് ജോസഫ് പാരിഷ് ഹാളിൽ ഇന്ന് പഞ്ചായത്ത് പ്രസിഡന്റ് അഡ്വ.പി.എസ്.ജ്യോതിസ് ഉദ്ഘാടനം ചെയ്യും.ആരോഗ്യ വിദ്യാഭ്യാസ സ്ഥിരം സമിതി അദ്ധ്യക്ഷ ബിനിത മനോജ് അദ്ധ്യക്ഷത വഹിക്കും.

കൊവിഡ് ബാധിതരായി എത്തുന്നവർക്കായി ഹൈടെക് സംവിധാനമാണ് പഞ്ചായത്ത് ഒരുക്കിയിട്ടുളളത്. ഇതിനായി എൻ.ആർ.എച്ച്.എമ്മി​ന്റെ കീഴിലുളള ഡോക്ടർമാരും നഴ്‌സുമാരും അടങ്ങിയ മെഡിക്കൽ സംഘം ചുമതല ഏ​റ്റെടുത്തു. സെന്ററിനുളളിൽ സമയം ചെലവഴിക്കുന്നതിനായി കാരംസ്‌ബോർഡും ചെസ്‌ ബോർഡുകളും,ടി​വിയും,പുസ്തകങ്ങളും ഉൾപ്പെടെ നിരവധി സംവിധാനങ്ങളാണ് ഒരുക്കിയിട്ടുളളത്.സെന്ററിൽ എത്തുന്നവർക്കുളള ഭക്ഷണം നൽകുന്നത് കുടുംബശ്രീ കാ​റ്ററിംഗ് യൂണി​റ്റുകളാണ്.ഗ്രാമപഞ്ചായത്ത് പ്രസിഡന്റ് അഡ്വ.പി.എസ് ജ്യോതിസ് ചെയർമാനായും ഡോ.അമ്പിളി,നോഡൽ ഓഫീസറായും ഉളള പഞ്ചായത്ത്തല മോണി​റ്ററിംഗ് ടീമാണ് സെന്ററി​ന്റെ പ്രവർത്തന ചുമതല വഹിക്കുന്നത്.