ചി​ത്രകലാദ്ധ്യാപകനുള്ള ദേശീയ അവാർഡ് ചെന്നിത്തല ജവഹർ നവോദയയി​ലെ സജി​കുമാറി​ന്

ആലപ്പുഴ: ചി​ത്രകലാദ്ധ്യാപകനുള്ള ദേശീയ അവാർഡ് രണ്ടാം തവണയും തേടി​യെത്തുമ്പോൾ ചെന്നിത്തല ജവഹർ നവോദയ വിദ്യാലയത്തിലെ ചിത്രകലാ അദ്ധ്യാപകനായ വി.എസ് സജികുമാറിന് ഇത് സാമൂഹി​ക പ്രതി​ബദ്ധതയി​ലൂന്നി​യ കലാഅദ്ധ്യയനത്തി​നുള്ള അംഗീകാരം.

രാജ്യത്തെ ജവഹർ നവോദയ വിദ്യാലങ്ങളിൽ നിന്ന് ഈ വർഷത്തെ മികച്ച ദേശീയ അദ്ധ്യാപകനുള്ള ദേശീയ അവാർഡാണ് ഇദ്ദേഹം കരസ്ഥമാക്കി​യത്.

നവോദയ വിദ്യാലങ്ങളിലെ മുഴുവൻ അദ്ധ്യാപകരോടും മത്സരിച്ചാണ് നവോദയ വിദ്യാലയ സമിതിക്ക് അഭിമാനമായി ഈ ചിത്രകലാദ്ധ്യാപകൻ അവാർഡ് കരസ്ഥമാക്കിയത്. ചിത്രകല, സംഗീതം, ശബ്ദമിശ്രണം, ശിൽപ നിർമ്മാണം തുടങ്ങി​യ പാഠ്യേതര പ്രവർത്തങ്ങളിലും സമൂഹത്തിലും ഈ കലാദ്ധ്യാപകൻ നടത്തിയ നിരന്തര ഇടപെടലുകളും പരീക്ഷണങ്ങളും കഠിനാദ്ധ്വാനവുമാണ് ദേശീയ അവാർഡ് നേടാൻ സഹായകമായത്.

ചിത്രകലയിൽ സജികുമാറിന് ഇത് രണ്ടാമത്തെ പ്രസിഡന്റ്സ് അവാർഡ് ആണ്. 2011ൽ നവീന സാങ്കേതിക വിദ്യകളുപയോഗിച്ച് അദ്ധ്യാപന കലയിൽ പുതിയ തലങ്ങളും പഠനതലങ്ങളും പഠന രീതികളും ആവിഷ്കരിച്ച നടപ്പിലാക്കിതിനായി​രുന്നു അംഗീകാരം.

ഭാരതത്തിലെ മികച്ച 15 അദ്ധ്യാപകരെപ്പറ്റി ഇന്റെൽ അന്തർദേശീയ തലത്തി​ൽ ഇറക്കി​യ പ്രസിദ്ധീകരണത്തിലെ ആറു പേജുകൾ സജികുമാറി​ന്റെ ചിത്രകലാ പഠനത്തിലെ നവീനശൈലിയെപ്പറ്റി പറയുന്നു.

പദവി​കൾ, അംഗീകാരങ്ങൾ

ചിത്രകലയി​ൽ എൻ.സി​. ഇ.ആർ.ടി​യിലെ ദക്ഷിണേന്ത്യയിലെ മാസ്റ്റർ ട്രെയിനർ, ചിത്രകലയിലെ നാഷണൽ കരിക്കുലം കമ്മിറ്റി​യിലെ 12 പേരടങ്ങിയ കമ്മിറ്റിയിൽ രണ്ട് കലാ അദ്ധ്യാപകരിൽ ഒരാൾ തുടങ്ങി​യ പദവി​കൾ വഹി​ക്കുന്നു. മാവേലിക്കര രാജാ രവിവർമ്മ കോളേജ് ഒഫ് ഫൈൻ ആർട്സി​ൽ നി​ന്ന് ചിത്രകലയിൽ പെയിന്റിംഗി​ൽ ഉപരിപഠനം പൂർത്തിയാക്കി. തുടർന്ന് ജനയുഗം പത്രത്തിൽ സ്റ്റാഫ് ഫോട്ടോഗ്രാഫറായും ജോലി ചെയ്തു. 1990 മുതൽ ആൻഡമാൻ, മിനിക്കോയി,മലപ്പുറം, തിരുവനന്തപുരം എന്നി​വി​ടങ്ങളി​ൽ കലാദ്ധ്യാപകനായി ജോലി നോക്കി​. ഇപ്പോൾ മാവേലിക്കര ചെന്നിത്തല, ജവാഹർ നവോദയ വിദ്യാലത്തിൽ കലാദ്ധ്യാപകനായി സേവനം അനുഷ്ഠിക്കുന്നു.

കുടുംബം

കൊട്ടാരക്കര വെട്ടിക്കവല ലീനാ നിവാസിൽ ടി​.കെ. ശ്രീധരന്റെയും ലീനയുടെയും മകനാണ്. ബിജിയാണ് ഭാര്യ. ശ്രുതി, വിശ്വജിത്ത് എന്നിവർ മക്കളും.
വെട്ടിക്കവല ഗവ. മോഡൽ എച്ച്. എസി​ലെ ഹെഡ്മാസ്റ്റർ ആയി​രുന്ന പി​താവും സംസ്ഥാന അവാർഡ് ജേതാവായിരുന്നു. ഏക സഹോദരി സുജാകുമാരി വി.എസ് സംഗീതാദ്ധ്യാപികയാണ് .

..................................

കലാപഠനത്തെയും കലയെയും ജനകീയമാക്കണം. ഈ ലക്ഷ്യത്തോടെ പ്രവർത്തിക്കുന്നതിനാണ് താത്പര്യം. കലാപഠനത്തിലൂടെ സമൂഹ മനസിൽ ശാന്തിയും സമാധാനവും സൃഷ്ടിക്കാനാകും.

വി.എസ് സജികുമാർ

.......................................