ആലപ്പുഴ: വി​ളവെടുപ്പി​ന്റെയും ഗൃഹാതുര ഓർമകളുടെയും ഉത്സവമായ ഓണമെത്തുന്നതോടെ ആഘോഷമേളമല്ല, മറി​ച്ച് കൊവി​ഡ് ഭീതി​യുടെ നടുക്കമാണ് ജനമനസുകളി​ൽ. കൊവിഡ് മാനദണ്ഡങ്ങളും സർക്കാർ നിർദേശങ്ങളും കാറ്റിൽ പറത്തി തെരുവിൽ കൂട്ടത്തോടെ ജനം ഇറങ്ങുന്നതാണ് പ്രശ്നം. ഓണാഘോഷം സമ്പർക്കവ്യാപനത്തിന് വഴിയൊരുക്കുമോയെന്ന ആശങ്കയിലാണ് ജില്ലാ ഭരണകൂടം.

ഓണക്കാലത്തോടനുബന്ധിച്ച് വ്യാപാരസ്ഥാപനങ്ങളുടെ നടത്തിപ്പുമായി ബന്ധപ്പെട്ട് പുതിയ മാർഗനിർദേശങ്ങൾ അധി​കൃതർ പുറത്തിറക്കിയി​ട്ടുണ്ട്. ഇന്നലെ ആലപ്പുഴ പട്ടണത്തിലെ മുഴുവൻ തുണിക്കടകളിലും ഉത്സവപറമ്പിനെ വെല്ലുന്ന ജനത്തി​രക്കാണ് അനുഭവപ്പെട്ടത്. 10വയസിന് താഴെയുള്ള കുട്ടികളുമായിട്ടാണ് തുണിക്കടകളിൽ സ്ത്രീകൾ എത്തിയത്. അടുത്ത മാസം രണ്ട് വരെ പ്രവർത്തന സമയം രാത്രി ഒൻപത് മണിവരെയാക്കി. പരിശോധിക്കേണ്ട ജീവനക്കാരെ മഷിയിട്ടു നോക്കിയാലും കാണാനി​ല്ലെന്ന ആക്ഷേപവുമുണ്ട്.

തുണിക്കടകളിലും പലവ്യഞ്ജന സാധനങ്ങൾ വിൽക്കുന്ന കടകളിലും പച്ചക്കറി കടകളിലും ബേക്കറികളിലും വലിയ തിരക്കാണ് അനുഭവപ്പെട്ടത്. മുല്ലയ്ക്കൽ തെരുവിൽ തലങ്ങും വിലങ്ങുമായി​ ഇരുചക്രവാഹനങ്ങൾ പായുന്നത് കാണാം. പൊലീസ് വല്ലപ്പോഴും പട്രോളിംഗി​ന് ഉണ്ടെങ്കിലും ജനത്തി​രക്ക് നിയന്ത്രിക്കാൻ കഴിയാത്ത തരത്തിലായി​രുന്നു. വരും ദിവസങ്ങളിൽ തിരക്ക് വർദ്ധിക്കാനാണ് സാദ്ധ്യത. ജീവനക്കാരിക്ക് കൊവിഡ് സ്ഥിരീകരിച്ചതിനെ തുടർന്ന് പട്ടണത്തിലെ തുണിക്കടകൾ അടച്ചിട്ട സംഭവം ഉണ്ടായിട്ടും ഇതൊന്നും ബാധി​ക്കാതെ നിയന്ത്രണങ്ങളൊന്നും ഇല്ലാതെയാണ് ജനങ്ങൾ തെരുവിൽ ഇറങ്ങിയത്. മാർക്കറ്റുകളിലും ആശങ്കയുണർത്തുന്ന അവസ്ഥയുണ്ട്. പൊലീസ് ഇന്നലെ ദേശീയപാതയോരത്ത് വാഹന പരിശോധന ശക്തമാക്കിയി​ട്ടുണ്ട്. ആരോഗ്യ വകുപ്പ് പ്രത്യേക മാർഗ നിർദേശങ്ങൾ നൽകിയിട്ടുണ്ടെങ്കിലും ഭക്ഷണ ശാലകളിൽ ഭക്ഷ്യ സുരക്ഷാ ഉദ്യോഗസ്ഥരും ഹെൽത്ത് ഇൻസ്പെക്ടർമാരും കാര്യമായ പരിശോധനകൾ നടത്തുന്നി​ല്ലെന്ന പരാതി​യുണ്ട്.

വ്യാപാര സ്ഥാപനങ്ങൾ ശ്രദ്ധി​ക്കാൻ

#സെപ്റ്റംബർ 2 വരെ രാവിലെ 7 മുതൽ രാത്രി 9 വരെ തുറന്നു പ്രവർത്തിക്കാം

# സാമൂഹിക അകലം പാലിച്ച് സ്ഥാപനത്തിന്റെ വലിപ്പത്തിനനുസരിച്ച് ആളുകളെ പ്രവേശിപ്പിക്കണം.
#കോവിഡ് മാനദണ്ഡങ്ങൾ പ്രകാരമുള്ള സുരക്ഷ സാമഗ്രികൾ ധരിച്ചെന്ന് ഉറപ്പ് വരുത്തണം

#ഒരേ സമയം സ്ഥാപനത്തിൽ പ്രവേശിക്കാൻ കഴിയുന്നവരുടെ എണ്ണം പുറത്ത് പ്രദർശിപ്പിക്കണം,

#ഉപഭോക്താക്കൾക്ക് വേണ്ട സാനിട്ടൈസറും മറ്റ് സൗകര്യങ്ങളും ഉറപ്പ് വരുത്തണം

#ഓൺലൈൻ പണമിടപാടുകൾ പ്രോത്സാഹിപ്പിക്കണം

#വീടുകളിൽ സാധനങ്ങൾ എത്തിച്ച് കൊടുക്കുന്ന സംവിധാനം പ്രയോജനപ്പെടുത്തണം

#ബാങ്കുകൾ, ഇൻഷ്വറൻസ് കമ്പനികൾ തുടങ്ങിയവയ്ക്ക് 50 ശതമാനം ജീവനക്കാരെവച്ച് പ്രവർത്തിക്കാം

#ഓണത്തോടനുബന്ധി​ച്ച് യാത്രകൾ ഒഴിവാക്കണം

# ഓണാഘോഷ പരിപാടികളും ഓണസദ്യയുമായി ബന്ധപ്പെട്ട തിരക്കുകളും ഒഴിവാക്കണം

വേണം ജാഗ്രത, നി​യന്ത്രണം

അന്യസംസ്ഥാനങ്ങളിൽ നിന്നും കൊണ്ടുവരുന്ന പൂക്കൾ പൂർണമായും ഒഴിവാക്കണം

പ്രാദേശികമായി ലഭിക്കുന്ന പൂക്കൾ കൊണ്ട് പൂക്കളം ഉണ്ടാക്കുക.

ഹോട്ടലുകൾക്കും റെസ്റ്റോറന്റുകൾക്കും കൊവിഡ് മാർഗ നിർദേശങ്ങൾ പാലിച്ച് രാത്രി 9 മണി വരെ പ്രവർത്തിക്കാം.

താമസസൗകര്യം ഉള്ള സ്ഥലങ്ങളിൽ പുതിയ താമസക്കാർ വരുന്നതിനു മുൻപ് അണുനശീകരണം നടത്തണം.

സ്ഥാപനങ്ങളിലെ ജീവനക്കാർ കൃത്യമായ ഇടവേളകളിൽ കൊവിഡ് ടെസ്റ്റിന് വിധേയനാകണം.