ന്യൂഡൽഹി: തലച്ചോറിലെ ശസ്‌ത്രിക്രിയയ്‌ക്ക് ശേഷം അതീവ ഗുരുതരാവസ്ഥയിലായ മുൻ രാഷ്‌ട്രപതി പ്രണബ് മുഖർജി മരുന്നുകളോട് പ്രതികരിക്കുന്നുണ്ടെന്ന് മകൻ അഭിജിത് മുഖർജി അറിയിച്ചു. പ്രധാന അവയവങ്ങളുടെ പ്രവർത്തനം കൃത്യമായി നടക്കുന്നുണ്ടെന്നും അദ്ദേഹം പറഞ്ഞു. അതേസമയം പ്രണബിന്റെ നില ഗുരുതരമായി തുടരുകയാണെന്നും വെന്റിലേറ്ററിന്റെ സഹായത്തോടെയാണ് കഴിയുന്നതെന്നും അദ്ദേഹത്തെ ചികിത്സിക്കുന്ന ഡൽഹി ആർമി റഫറൽ ആശുപത്രി അറിയിച്ചു. ഒരാഴ്‌ച മുമ്പാണ് 84കാരനായ പ്രണബിനെ തലച്ചോറിൽ രക്തം കട്ടപിടിച്ചതിനെ തുടർന്ന് ആശുപത്രിയിൽ പ്രവേശിപ്പിച്ചത്. ശസ്‌ത്രക്രിയയ്‌ക്കു മുന്നോടിയായുള്ള പരിശോധനയിൽ അദ്ദേഹത്തിന് കൊവിഡ് സ്ഥിരീകരിച്ചിരുന്നു.