ആലുവ: നാണയം വിഴുങ്ങിയ മൂന്നുവയസുകാരൻ പൃഥ്വിരാജുമായി ചികിത്സയ്ക്കായി അലഞ്ഞ മാതാവിനും മുത്തശ്ശിക്കും സഹായവുമായി കൂടെനിന്ന ആട്ടോ ഡ്രൈവർക്ക് അഭിനന്ദനപ്രവാഹം. ചൂർണിക്കര വില്ലേജ് ഓഫീസിനു സമീപം വാടകവീട്ടിൽ താമസിക്കുന്ന പൗണ്ടയിൽ ബാബുവർഗീസിനെ ഇന്നലെ രാവിലെ ബി.ജെ.പി നേതാവ് കുമ്മനം രാജശേഖരനും ഫോണിൽവിളിച്ച് അഭിനന്ദിച്ചു. സ്വന്തം മകൻ തളർന്നുകിടക്കുന്നതിന്റെ വേദന ഉള്ളിലൊളിപ്പിച്ചായിരുന്നു ബാബുവിന്റെ കാരുണ്യയാത്ര.
'കേരളകൗമുദി'യിൽ പ്രസിദ്ധീകരിച്ച വാർത്ത കണ്ട കുമ്മനം ബി.ജെ.പി എറണാകുളം ജില്ലാ വൈസ് പ്രസിഡന്റ് എം.എൻ. ഗോപിയുമായി ബന്ധപ്പെട്ടു. ഗോപി ആലുവ ലേഖകനിൽനിന്ന് ബാബു വർഗീസിന്റെ മൊബൈൽ നമ്പർ സംഘടിപ്പിച്ച് കുമ്മനത്തിന് നൽകി. ബാബുവിന്റെ സേവനത്തോടൊപ്പം അദ്ദേഹത്തിന്റെ കഷ്ടപ്പാടുകൾ കൂടി രേഖപ്പെടുത്തി കുമ്മനം തന്റെ ഒൗദ്യോഗിക ഫേസ്ബുക്ക് പേജിൽ ശരീരം തളർന്ന ബാബുവിന്റെ മകന്റെ ചിത്രംകൂടി പോസ്റ്റുചെയ്തു. ഒരുമണിക്കൂറിനകം നൂറുകണക്കിന് ആളുകളാണ് ഷെയർ ചെയ്തത്.
കുമ്മനത്തിന്റെ എഫ്.ബി പോസ്റ്റ്
ബാബു വറുഗീസ്, നിങ്ങളാണ് നാടിന്റെ മാതൃക. കുട്ടി നാണയം വിഴുങ്ങിയതുമൂലം ചികിത്സയ്ക്ക് വേണ്ടി കണ്ണീരൊഴുക്കി നിസഹായരായി നിന്ന അമ്മയെയും അമ്മൂമ്മയെയും ആട്ടോറിക്ഷയിൽ കയറ്റി എറണാകുളത്തു എത്തിച്ചു. തിരിച്ച് ആലപ്പുഴ ആശുപത്രിയിൽനിന്ന് വീട്ടിലെത്തിച്ചു. അഭിനന്ദനങ്ങൾ. നാടിന്റെ അഭിമാനമാണ് അങ്ങ്. സ്വന്തം മകൻ തളർന്ന് വീട്ടിൽ കിടക്കപ്പായയിൽ മുക്കിയും മൂളിയും നിരങ്ങിയും കഴിയുമ്പോഴും ചികിത്സിക്കാൻ കടമെടുത്തു നട്ടംതിരിയുമ്പോഴും അങ്ങയുടെ മന:സാക്ഷി മരവിച്ചില്ല. ആ അമ്മമാരുടെ കണ്ണീർ ബാബുവിന്റെ മനുഷ്യത്വത്തെ ഉണർത്തി.
തിരുവല്ലയിൽ വണ്ടിയിടിച്ചു മാരകമായ പരിക്കുകളോടെ രക്തം വാർന്നൊലിച്ചു കിടന്ന ബൈക്ക് യാത്രക്കാരനെ സഹായിക്കാൻ കൂട്ടം കൂടിനിന്നവരാരും തയ്യാറായില്ലെന്ന വാർത്തകേട്ട് തരിച്ചുനിന്ന 'പ്രബുദ്ധകേരളം' ഇന്ന് അങ്ങയെ ഓർത്ത് അഭിമാനിക്കുന്നു.
ജീവിതത്തിന്റെ പരുക്കൻ യാഥാർത്ഥ്യങ്ങളെ നേരിൽ കണ്ടതിന്റെ അനുഭവസമ്പത്ത് അങ്ങയെ മഹാനാക്കുന്നു.
സ്വന്തംകുടുംബം കഷ്ടപ്പെടുമ്പോഴും ആ അമ്മയും കുഞ്ഞും അമ്മൂമ്മയും അനുഭവിച്ച വേദന സ്വന്തം നെഞ്ചിലേറ്റുവാങ്ങിയ അങ്ങേയ്ക്ക് അനന്തകോടി നമസ്‌കാരം.
ബാബു വറുഗീസ്, അങ്ങ് തനിച്ചല്ല. മകന്റെ ചികിത്സയ്ക്ക് ആവുന്ന എല്ലാ സഹായവും നൽകാൻ ഈനാട്ടിൽ ജീവകാരുണ്യകരായ സുമനസുകൾ മുന്നോട്ടുവരും. ഒപ്പം നമ്മൾ ഉണ്ട്.
Account Details:-
Mr Babu Varghese.
Ac No :- 14660100031694
Federal Bank , Aluva
IFSC :- FDRL0001132