•യു.എ.ഇ.യിൽ നിന്ന് രണ്ട് കമ്പനികൾ

ദുബായ്: ആഗോള റീട്ടെയിൽ മേഖലയിലെ മുൻനിര കമ്പനികളുടെ പട്ടികയിൽ ലുലു ഗ്രൂപ്പും. പ്രമുഖ ഓഡിറ്റ് സ്ഥാപനമായ ഡിലോയിറ്റ് പ്രസിദ്ധീകരിക്കുന്നതാണ് ഈ പട്ടിക.

യു.എ.ഇ. റീട്ടെയിൽ മേഖലയിൽ നിന്ന് ലുലു ഹൈപ്പർമാർക്കറ്റും മാജിദ് അൽ ഫുത്തൈം ഗ്രൂപ്പിന്റെ ക്യാരിഫോറുമാണ് പട്ടികയിൽ സ്ഥാനം പിടിച്ചത്. അമേരിക്കൻ കമ്പനിയായ വാൾമാർട്ടാണ് പട്ടികയിൽ മുൻനിരയിൽ. കോസ്റ്റ്കോ ഹോൾ സെയിൽ കോർപ്പറേഷൻ, ആമസോൺ, ദ ക്രോഗർ കമ്പനി എന്നീ അമേരിക്കൻ കമ്പനികളും

ജർമ്മൻ കമ്പനിയായ ഷ്വാർസ് ഗ്രൂപ്പും തൊട്ടുപി​ന്നി​ലുണ്ട്. പ്രമുഖ സ്വീഡിഷ് ഫർണ്ണിച്ചർ കമ്പനിയായ ഐക്കിയ, ഇന്ത്യയിലെ റിലയൻസ് റീട്ടെയിൽ എന്നിവരും പട്ടികയിൾപ്പെടുന്നു.

ആഗോള റീട്ടെയിൽ സ്ഥാപനങ്ങളുടെ പട്ടികയിൽ ഇടം പിടിച്ച മലയാളി ഉടമസ്ഥതയിലുള്ള ഏക സ്ഥാപനവും ലുലുവാണ്. 191 ഹൈപ്പർമാർക്കറ്റുകളാണ് ലുലു ഗ്രൂപ്പി​നുള്ളത്.

ആഗോള വാണിജ്യ മേഖലകളെ കൊവിഡ് മന്ദഗതിയിലാക്കുമ്പോഴും

അബുദാബി ആസ്ഥാനമായ ലുലു ഗ്രൂപ്പ് വിവിധ രാജ്യങ്ങളിലായി കൂടുതൽ ഹൈപ്പർമാർക്കറ്റുകൾ ആരംഭിക്കാനുള്ള നീക്കങ്ങളി​ലാണ്.

കഴിഞ്ഞ രണ്ടാഴ്ചക്കുള്ളിൽ അബുദാബി, ഈജിപ്തിലെ കയ്റോ, ഇന്തോനേഷ്യയിൽ ജക്കാർത്ത എന്നിവിടങ്ങളിൽ മൂന്ന് ഹൈപ്പർമാർക്കറ്റുകൾ ലുലു ഗ്രൂപ്പ് തുറന്നു.

യു.എ.ഇ.യിൽ മാത്രം അടുത്ത ഒരു വർഷത്തിനുള്ളിൽ 8 മുതൽ 12 വരെ ഹൈപ്പർമാർക്കറ്റ് ആരംഭിക്കുമെന്ന് ലുലു ഗ്രൂപ്പ് ചെയർമാൻ എം.എ.യൂസഫലി പറഞ്ഞു. മറ്റ് ജി.സി.സി. രാജ്യങ്ങൾ, ഈജിപ്ത്, ഇന്തോനേഷ്യ, മലേഷ്യ

എന്നിവിടങ്ങളിലും ഹൈപ്പർമാർക്കറ്റുകൾ തുടങ്ങും. കൊവി​ഡ് വ്യാപനം വെല്ലുവി​ളി​യായി​ട്ടുണ്ടെങ്കി​ലും പ്രവർത്തനം വിപുലീകരിക്കുവാനാണ് ഉദ്ദേശിക്കുന്നതെന്ന് യൂസഫലി പറഞ്ഞു.

തൃശൂർ, കോട്ടയം, കാസർകോട്, പെരിന്തൽമണ്ണ, പാലക്കാട്, കോഴിക്കോട് എന്നിവിടങ്ങളിലുംഹൈപ്പർ മാർക്കറ്റുകൾക്കുള്ള പ്രാരംഭ നടപടികൾ ആരംഭിച്ചിട്ടുണ്ടെന്നും യൂസഫലി അറിയിച്ചു.