കൊച്ചി: കടൽ സസ്തനികളുടെയും കടലാമകളുടെയും പഠനം ലക്ഷ്യമിട്ട് 5.6 കോടി രൂപയുടെ ഗവേഷണ പദ്ധതിക്ക് കേന്ദ്ര സമുദ്രമത്സ്യ ഗവേഷണ സ്ഥാപനം (സി.എം.എഫ്.ആർ.ഐ) തുടക്കമിട്ടു. സമുദ്രോൽപന്ന കയറ്റുമതി വികസന അതോറിറ്റിയുടെ (എം.പി.ഇ.ഡി.എ) സാമ്പത്തിക സഹായത്തോടെ നടപ്പിലാക്കുന്ന പദ്ധതിയിൽ ഇന്ത്യൻ സമുദ്രഭാഗത്തുള്ള 27കടൽ സസ്തനികളുടെയും അഞ്ച് കടലാമകളുടെയും നിലവിലെ അവസ്ഥയാണ് പഠനവിധേയമാക്കുന്നത്. കേന്ദ്രവന്യജീവി സംരക്ഷണ നിയമപ്രകാരം ഷെഡ്യൂൾ ഒന്നിലാണ് കടൽ സസ്തനികളെയും കടലാമകളെയും ഉൾപ്പെടുത്തിയിരിക്കുന്നത്. എന്നാൽ, പല വിധേനയുള്ള മനുഷ്യ ഇടപെടൽ മൂലം ഇവയുടെ ജീവന് ഭീഷണിയാകുന്ന സംഭവങ്ങൾ ഇന്ത്യൻ തീരങ്ങളിൽ റിപ്പോർട്ട് ചെയ്യപ്പെടുന്നുണ്ട്. വംശസംഖ്യയെ കുറിച്ചുള്ള കൃത്യമായ വിവരങ്ങൾ ലഭ്യമല്ലാത്തത് കടൽസസ്തനികളുടെയും കടലാമകളുടെയും സംരക്ഷണത്തിന് പ്രതിസന്ധി സൃഷ്ടിക്കുന്നു.

അമേരിക്കയിലേക്ക് സമുദ്രോഭക്ഷ്യ വിഭവങ്ങൾ ഇറക്കുമതി ചെയ്യുന്നവർ കടൽസസ്തനികളുടെ വംശസംഖ്യ ബൈകാച്ചായി പിടിക്കപ്പെടുന്ന സസ്തനികളുടെ എണ്ണം എന്നിവയെ അടിസ്ഥാനമാക്കിയുള്ള സംരക്ഷണ നിയന്ത്രണങ്ങൾ കൊണ്ടുവരണമെന്ന് യു.എസ് ആവശ്യപ്പെട്ടിരിക്കുകയാണ്. 2017 മുതൽ അഞ്ച് വർഷത്തിനുള്ളിൽ ഇത് നടപ്പിലാക്കണമെന്നാണ് നിർദേശം.സമുദ്രോൽപന്നങ്ങൾ കയറ്റുമതി ചെയ്യുന്ന രാജ്യങ്ങൾ മത്സ്യബന്ധനം നടത്തുമ്പോൾ കടൽ സസ്തനികളെ മന:പൂർവം കൊല്ലുന്നത് അനുവദിക്കരുതെന്ന അമേരിക്കൻ നിയമം ആവശ്യപ്പെടുന്നുണ്ട്. മാത്രമല്ല, ചെമ്മീൻ പിടിക്കുമ്പോൾ കടലാമകളെ ദോഷകരമായി ബാധിക്കുന്നില്ലെന്ന് യു.എസ് അംഗീകാരപത്രം നൽകുന്നത് വരെ ഒരു രാജ്യത്തിന്റെയും ചെമ്മീൻ ഇറക്കുമതി ചെയ്യേണ്ടെന്നാണ് ഇവരുടെ നിലപാട്. ഇക്കാരണത്താൽ 2018 മുതൽ ഇന്ത്യയിൽ നിന്നുള്ള ചെമ്മീൻ ഇറക്കുമതി അമേരിക്ക നിരോധിച്ചിരിക്കുകയാണ്.

സമുദ്രഭക്ഷ്യോൽപ്പന്നങ്ങളുടെ കയറ്റുമതിയുമായി ബന്ധപ്പെട്ട പ്രതിസന്ധി പരിഹരിക്കുന്നതലേക്കുള്ള വഴികൾ എളുപ്പമാക്കാൻ സി.എം.എഫ്.ആർ.ഐയുടെ പുതിയ പഠനം ഉപകരിക്കുമെന്ന് ഗവേഷണ പദ്ധതിക്ക് തുടക്കമിടുന്നതിനായി സംഘടിപ്പിച്ച വെർച്വൽ ശിൽപശാല ഉദ്ഘാടനം ചെയ്ത ഭാരതീയ കാർഷിക ഗവേഷണ കൗൺസിൽ ഡെപ്യൂട്ടി ഡയറക്ടർ ജനറൽ ഡോ.ജെ.കെ ജെന പറഞ്ഞു. കയറ്റുമതി പ്രതിസന്ധി നേരിടുന്ന പശ്ചാത്തലത്തിൽ, അമേരിക്കയിലെ നാഷണൽ ഓഷ്യാനിക് ആൻഡ് അറ്റ്‌മോസ്ഫറിക് അഡ്മിനിസ്‌ട്രേഷന്റെ സാങ്കേതിക സഹകരണത്തോടെ നടപ്പാക്കുന്ന ഗവേഷണ പദ്ധതിയെ പ്രതീക്ഷയോടെയാണ് രാജ്യം ഉറ്റുനോക്കുന്നതെന്ന് എം.പി.ഇ.ഡി.എ ചെയർമാൻ കെ.എസ് ശ്രീനിവാസ് ഐ.എ.എസ് പറഞ്ഞു. കടൽ സസ്തനികളും കടലാമകളും സമുദ്രആവാസവ്യവസ്ഥയുടെ സംരക്ഷണത്തിൽ പ്രധാന പങ്കുവഹിക്കുന്നുണ്ടെന്നും ഇതുമായി ബന്ധപ്പെട്ട് സി.എം.എഫ്.ആർ.ഐ നിരവധി പഠനങ്ങൾ നടത്തിയിട്ടുണ്ടെന്നും സി.എം.എഫ്.ആർ.ഐ ഡയറക്ടർ ഡോ.എ.ഗോപാലകൃഷ്ണൻ പറഞ്ഞു.