കൊച്ചി: ഫെഡറൽ ബാങ്കിനു കീഴിലുള്ള നൈപുണ്യവികസന പരിശീലന സ്ഥാപനമായ ഫെഡറൽ സ്‌കിൽ അക്കാഡമി അദ്ധ്യാപനരംഗത്ത് തൊഴിൽ തേടുന്നവർക്ക് പുതിയ നൈപുണ്യവികസന കോഴ്‌സ് സംഘടിപ്പിക്കുന്നു. അദ്ധ്യാപന രംഗത്തുണ്ടായ ഏറ്റവും പുതിയ മാറ്റങ്ങളും സാങ്കേതികവിദ്യകളും ഉൾക്കൊള്ളാനും അവ പ്രയോഗിക്കാനും സജ്ജരായ പുതിയ തലമുറ അദ്ധ്യാപകരെ വാർത്തെടുക്കുകയാണ് ലക്ഷ്യം. കൊവിഡ് പശ്ചാത്തലത്തിൽ അദ്ധ്യാപന രംഗത്തുണ്ടായ സാങ്കേതികമാറ്റങ്ങളുമായും അതിരുകളില്ലാത്ത ക്ലാസ്‌മുറികളെന്ന സങ്കൽപ്പവുമായും വേഗത്തിൽ ഇണങ്ങിച്ചേരാൻ ഭാവി അദ്ധ്യാപകരെ കോഴ്‌സ് പ്രാപ്തരാക്കും.
അവസാനവർഷ ബിഎഡ് വിദ്യാർത്ഥികൾക്കും ബിഎഡ് പൂർത്തിയാക്കി തൊഴിലന്വേഷിക്കുന്നവർക്കുമാണ് കോഴ്‌സിൽ പ്രവേശനം നൽകുന്നത്. 500 മണിക്കൂറുകളാണ് കോഴ്‌സ് ദൈർഘ്യം. ആദ്യബാച്ച് കൊച്ചിയിലെ ഫെഡറൽ സ്‌കിൽ അക്കാഡമിയിൽ നടക്കും. പരിശീലനം പൂർത്തിയാക്കുന്നവർക്ക് പ്ലേസ്‌മെന്റ് സഹായങ്ങളും നൽകും.