കൊച്ചി: കൊവിഡ് മഹാമാരിയെത്തുടർന്ന് മാറിക്കൊണ്ടിരിക്കുന്ന സാമൂഹിക, വിദ്യാഭ്യാസ, ആരോഗ്യ, തൊഴിൽ മേഖലകളെക്കുറിച്ചും വൈദഗ്ദ്ധ്യ വികസനത്തെക്കുറിച്ചും കുസാറ്റ് ലൈബ്രറി പ്രഭാഷണ പരമ്പര സംഘടിപ്പിക്കുന്നു. 24 ന് രാവിലെ 11ന് വൈസ് ചാൻസലർ ഡോ.കെ. എൻ. മധുസൂദനൻ ഉദ്ഘാടനം ചെയ്യും. കോഴിക്കോട് ഐ.ഐ.എം. ഡയറക്ടർ ഡോ. ദേബാശിഷ് ചാറ്റർജി 'മാറുന്ന വിദ്യാഭ്യാസ മേഖല'യെക്കുറിച്ച് പ്രഭാഷണം നടത്തും. 25 ന് 1.30 ന് 'രോഗ പ്രതിരോധവും ആരോഗ്യവും' എന്ന വിഷയത്തിൽ അമൃത ഇൻസ്റ്റിറ്റ്യൂട്ട് ഒഫ് മെഡിക്കൽ സയൻസിലെ ഡോ. പദ്മനാഭ ഷേണായി പ്രഭാഷണം നടത്തും. മാനസിക ആരോഗ്യത്തെക്കുറിച്ച് തിരുവനന്തപുരം മെഡിക്കൽ കോളേജിലെ ഡോ.അരുൺ ബി.നായർ 26ന് 11.30ന്, 'വെർച്ച്വൽ ലേണിംഗ് സ്ട്രാറ്റജീസ് ആൻഡ് ടിപ്‌സ്' എന്ന വിഷയത്തെക്കുറിച്ച് കോഴിക്കോട് എൻ.ഐ.ടി. പ്രൊഫ. എസ്.എം. സമീർ 27 ന് 11 ന്, 'പുതിയ നിയമനരീതികൾക്ക് എങ്ങനെ തയ്യാറെടുക്കാം' എന്നതിനെക്കുറിച്ച് കോഴിക്കോട് ഐ.ഐ.എം. ലൈബ്രേറിയൻ ഡോ.എം.ജി. ശ്രീകുമാർ സെപ്‌തംബർ 4ന് 11 ന് എന്നിവയാണ് മറ്റു പ്രഭാഷണങ്ങൾ. ഓൺലൈനായി നടക്കുന്ന പ്രഭാഷണ പരമ്പരയിൽ പ്രവേശനം സൗജന്യം. വിശദ വിവരങ്ങൾ library.cusat.ac.in എന്ന വെബ് സൈറ്റിൽ ലഭ്യമാണ്.