കൊച്ചി: കൊവിഡ് അപെക്‌സ് ചികിത്സാകേന്ദ്രമായ കലൂർ പി.വി.എസ് ആശുപത്രിയുടെ പഴയബ്ലോക്കും പരിസരവും അണുനശീകരണം നടത്തി വൃത്തിയാക്കി. ധനകാര്യ മന്ത്രാലയത്തിന് കീഴിലുള്ള നാഷണൽ അക്കാഡമി ഒഫ് കസ്റ്റംസ്, ഇൻഡയറക്‌ട് ടാക്‌സ് ആൻഡ് നാർക്കോട്ടിക്‌സ് കൊച്ചി സോണൽ കാമ്പസിന്റെ സഹായത്തോടെയാണ് അണുനശീകരണ പ്രവർത്തനങ്ങൾ നടത്തിയത്. ഒരു വർഷത്തോളമായി പ്രവർത്തനരഹിതമായി കിടക്കുന്ന ആശുപത്രി കെട്ടിടത്തിന്റെ ശുചീകരണ പ്രവർത്തനങ്ങൾ നടന്നുവരികയാണ്. അക്കാഡമിയുടെ സ്വച്ഛത ആക്ഷൻ പ്ലാൻ 2020 ന്റെ ഭാഗമായാണ് ശുചീകരണ പ്രവർത്തനങ്ങളിൽ പങ്കാളിയായത്. അക്കാഡമി അഡിഷണൽ ഡയറക്ടർ ജനറൽ മനീഷ് ചന്ദ്ര ഉൾപ്പടെയുള്ള ഉദ്യോഗസ്ഥർ ആശുപത്രി സന്ദർശിച്ചു.